دەم پارتی لەبارەی دەستگیركردنی ئەكرەم ئیمامئۆغلۆ، سەرۆكی گەورە شارەوانی ئیستانبوڵ رایگەیاند، ئەوەی لە توركیا دەگوزەرێت كودەتایە. پارتەكە دەشڵێت، دەستگیركردنی ناوبراو نایاساییەو داوا دەكەن دەستبەجێ ئازادبكرێت.
ئاوێنە: دەستەی بەڕێوەبەریی ناوەندیی دەم پارتی، ئەمڕۆ چوارشەممە، لە راگەیەندراوێكدا وتی، سەرلەبەیانی ئەمڕۆ، خەڵکێکی زۆر لە نێویاندا ئەکرەم ئیمامئۆغڵو، سەرۆکی گەورەشارەوانیی ئیستانبوڵ، رەسوڵ ئەمرا شاهان، سەرۆکی شارەوانی شیشلی، کارگێڕانی شارەوانی و رۆژنامەڤانان دەستبەسەرکران.
وتوشیەتی، وەک پێشتر چەندینجار ئاماژەمان پێدا، هەمو ئەم کردەوانە بەتەواوەتی کردەوەی کودەتایین. تورکیا پڕۆسەیەكی كودەتای مەدەنی رو لە زیادبون بەخۆیەوە دەبینێت كە بەرهەمی دەسەڵاتی دادوەریی و حكومەتەو هەمو ئۆپۆزسیۆنێکی سیاسی و کۆمەڵایەتی دەکاتە ئامانج.
دەم پارتی پێیوایە، بڕیاری دەستگیركردنەكە نایاسایی، سەرەڕۆیانەو دژە دیموکراسییە کە "ساڵانێکە دژی پارتەکەشمان پیادە کراوە".
وتویەتی"ئەوەی ئەمڕۆ دەگوزەرێت هێرشێکە بە ئامانجی شکاندنی هیوای خەڵکی تورکیا بۆ ئاشتی و دیموکراسی. هەوڵێکە بۆ تێکدانی دەستپێشخەری گۆڕانکاری کە لە تورکیاوە دەستپێدەکات و بەرەو رۆژهەڵاتی نێوەڕاست بڵاودەبێتەوە. ئێمە هەرگیز ئەمە قبوڵ ناکەین. ئەم کارانە هەرگیز سودی نە بۆ تورکیا و نە بۆ ئەو کەسانە نابێت کە پەسەندی دەکەن".
دەم پارتی داوای لە حکومەتی تورکیا كردوە دەستبەرداری ئەو كردەوانە بێت و ئەوانەی ئەمڕۆ دەستبەسەرکراون بەتایبەت ئەکرەم ئیمامئۆغڵو دەستبەجێ ئازاد بکرێن.