وتەبێژی حووسییەکان ڕایگەیاند، هێزەكانمان مووشه‌کێکی کروز و فڕۆکەیەکی بێفڕۆکەوانی پڕ لە تەقەمەنییان بەرەو کەشتییەکی فڕۆکە هەڵگری ئەمریکی لە دەریای سوور هەڵدا، دەشڵێت، ئەگەر هێرشەكان بۆسەر غەزە ڕانەگیرێت ئەوا هێرشە سەربازییەکانمان دژی ئیسرائیل توندتر دەبنەوە.
ئاوێنە: یەحیا سەریع، وتەبێژی حووسییەکان سەبارەت بە هێرشێكی هێزەكانیان بۆسەر کەشتییەکی فڕۆکە هەڵگری ئەمریکی لە دەریای سوور ڕایگەیاند، هێزەكانمان جوڵە سەربازییەکانی دوژمنیان لە دەریای سوور دەستنیشانکرد، کە خۆیان ئامادە دەکرد بۆ هێرشێکی بەرفراوان بۆ سەر وڵاتەکەمان، لە بەرامبەردا هێزەكانمان ژمارەیەک جۆری مووشەکی کروز و فڕۆکەی بێفڕۆکەوانیان، بەرە و کەشتی فڕۆکە هەڵگری ئەمریکی یو ئێس ئێس هاری ترومان هەڵداوە.
ئاماژە بەوەشکراوە، ئەگەر هێرشەكان بۆسەر غەزە ڕانەگیرێت و گەمارۆکە هەڵنەگیرێت، ئەوا هێرشەكانمان دژی ئیسرائیل توندتر دەبنەوە.
دەشڵێت، ئەمریکا پارێزگاکانی سەعدە و حەجای لە باکووری ڕۆژئاوای یەمەن و پارێزگای حودەیدە لە ڕۆژئاوای وڵاتەكەمانیان بۆردوومان کردووە.
هاوكات، بەرپرسانی ئەمریکا ڕایانگەیاندووە، هێرشەکان بۆ چەند ڕۆژێک و ڕەنگە چەند هەفتەیەک بەردەوامدەبن ئەگەر هێرشی حووسییەکان بۆ سەر کەشتیوانی لەدەریای سوور نەوەستێن.