ئەکرەم ئیمامئۆغڵو، سەرۆکی گەورە شارەوانی ئیستانبوڵ و 100 کەسی دیکە دەستگیرکران.
ئاوێنە: ئەمڕۆ چوارشەممە، لەسەر سکاڵای داواکاری گشتی، ئەکرەم ئیمامئۆغڵو، سەرۆکی گەورە شارەوانی ئیستانبوڵ بە تۆمەتی گەندەڵی لەگەڵ 100 کەسی دیکە دەستگیرکران.
بەرپرسانی جەهەپە ئاماژە بەوە دەکەن هەرچەندە بەرگێکی یاسایی بە بەر دۆسیەکەی ئیمامئۆغڵودا کراوە، بەڵام گومان دەکرێت ئامانجی سیاسی لە پشتەوە بێت بەتایبەتی کە لەهەڵبژاردنی سەرۆکایەتی داهاتوودا ئیمامئۆغلو خۆی بۆ پۆستی سەرۆکایەتی کۆمار کاندید دەکردو دەبووە ڕکابەرێکی بەهێزی ڕەجەب تەیب ئەردۆغان، سەرۆک کۆماری ئێستا کە ئەویش بە نیازە جارێکی دیکە خۆی بۆ پۆستەکە کاندید بکاتەوە.
ئەکرەم ئیمامئۆغڵو لە دوو هەڵبژاردندا توانی بەسەر کاندیدی پارتی داد و گەشەپیدانی فەرمانڕەوای تورکیادا سەربکەوێت و پۆستی سەرۆکی گەورەی شارەوانی ئیستانبوڵ بەدەستبهێنێت.
دوێنێش زانکۆی ئیستانبوڵ بڕوانامە ئەکرەم ئیمامئۆغڵوی هەڵوەشاندەوە کە مەرجێکی سەرەکییە بۆ هەر کەسێک کە بیەوێت خۆی بۆ پۆستی سەرۆکایەتی کاندید بکات.