ڤلادیمیر پوتن، سەرۆکی ڕوسیا ئه‌مڕۆ هەینی وەڵامی پێشنیازی دۆناڵد ترەمپ هاوتا ئەمریکییەکەی دایەوە بۆ "رزگارکردنی گیانی سەربازانی ئۆکرانیا لە کورسک"، ده‌شڵێت، "پێویستە سەرکردایەتی سەربازی و سیاسی ئۆکرانیا فەرمانێک بۆ سەربازەکانی دەربکات کە چەک دابنێن و تەسلیم بن".
ئاوێنە: ڤلادیمیر پوتن لە میانی کۆبونەوەی ئەنجومەنی ئاسایشی ڕوسیا ڕایگه‌یاند، "ئەمڕۆ پێشنیاری سەرۆکی ئەمریکا تره‌مپ دەخوێنینەوە بۆ ڕزگارکردنی ژیانی کارمەندانی سوپای ئۆکرانیا کە لەلایەن هێزەکانی ڕوسیا لە کورسک گەمارۆدراون".
ئاماژه‌ی به‌وه‌شكرد، بۆ ئەوەی بانگەوازەکەی سەرۆکی ئەمریکا بە شێوەیەکی کاریگەر جێبەجێ بکرێت، پێویستە سەرکردایەتی سەربازی و سیاسی ئۆکرانیا فەرمانێک بۆ سەربازەکانی دەربکات کە چەک دابنێن و تەسلیم بن.
ڤلادیمیر پوتن باسی له‌وه‌شكرد، "هێزە چەکدارەکانی ئۆکرانیا تاوانیان دژی دانیشتوانی مەدەنی لە ناوچەی کورسک ئەنجامداوە، کە پۆلیسی ڕوسیا بە تیرۆر پۆلێنی کردوە".
لە درێژەی قسەکانیدا وتی، "ئێمە لە بانگەوازەکەی سەرۆک تره‌مپ تێدەگەین کە بە ڕەچاوکردنی مرۆیی سەبارەت بەم سەربازانە ڕێنمایی بکرێت"، جەختی لەوەکردەوە، کە ئەگەر سەربازانی ئۆکرانیا لە پارێزگای کورسک چەکەکانیان دابنێن، ئاسایش و ژیانیان مسۆگەر دەبێت.
پێشتر دۆناڵد ترەمپ، سەرۆکی ویلایەتە یەکگرتوەکانی ئەمریکا ڕایگەیاند، دوێنێ پێنجشەممە لەگەڵ هاوتا ڕوسیەکەی قسەی کردوە و داوای لێکردوە "بەزەیی بەو هێزانەی ئۆکرانیادا بێتەوە کە بەتەواوی لە پارێزگای کورسک گەمارۆدراون" لە باشوری ڕۆژئاوای ڕوسیا.
ترەمپ ئاشکرایکرد کە گفتوگۆکانی لەگەڵ پوتن زۆر "باش و بنیاتنەر" بوە و داوای لێکردوە "بەزەیی بە هێزەکانی ئۆکرانیای بەتەواوی گەمارۆدراو" لە ئۆبلاستی کورسکدا بێتەوە.