یسرائیل كاتز، وەزیری بەرگریی ئیسرائیل لەبارەی كۆمەڵكوژییەكانی هێزەكانی سەربە دیمەشق بەرامبەر بە عەلەوییەكان لە سوریا، رایگەیاند، جۆلانی ماسكەكەی خۆی فڕێ دا و روخسارە راستەقینەكەی خۆی دەرخست كە تیرۆریستێكی جیهادی سەربە قوتابخانەی قاعیدەیەو تاوانی تۆقێنەر بەرامبەر بە عەلەوییەكان ئەنجام دەدات.
ئاوێنە: یسرائیل كاتز، وەزیری بەرگریی ئیسرائیل لە پۆستێكدا لە هەژماری خۆی لە تۆڕی ئێكس نوسیویەتی"جۆلانی جبەی لەبەری خۆی داكەندو قات و بۆینباخی پۆشی و روخسارێكی میانڕەوی ساختەی لەخۆی نیشان دا. ئێستا ماسكەكەی خۆی فڕێدا و روخسارە راستەقینەكەی خۆی دەرخست كە تیرۆریستێكی جیهادی سەر بە قوتابخانەی قاعیدەیەو تاوانی تۆقێنەر بەرامبەر بە هاوڵاتیانی مەدەنیی عەلەوی ئەنجام دەدات."
جەختیشی كردۆتەوە، ئیسرائیل بەرامبەر هەر هەڕەشەیەك لە سوریاوە بەرگریی لە خۆی دەكات. ئێمە لە زۆنە ئەمنییەكان دەمێنینەوەو پارێزگاری لە خەڵكی جۆلان و جەلیل دەكەین.
وەزیری بەرگریی ئیسرائیل وتوشیەتی، "پارێزگاری لەوە دەكەین كە باشوری سوریا لە چەك داماڵراو و خاڵی بێت لە هەر هەڕەشەیەك. پارێزگاری لە دروزەكان دەكەین، هەر كەسێك ئازاریان پێ بگەیەنێت، روبەڕوی وەڵامی ئێمە دەبێتەوە."