دۆناڵد ترەمپ، سەرۆكی ئەمریكا رایگەیاند، دوای ئەوەی ریاز رازی بوە بەوەی كە لەماوەی چوار ساڵی داهاتودا، بە بڕی یەك ترلیۆن دۆلار وەبەرهێنان لە كۆمپانیا ئەمریكییەكاندا بكات، لەماوەی یەك مانگ و نیوی داهاتودا سەردانی سعودیە دەكەم.

ئاوێنە: دۆناڵد ترەمپ، سەرۆكی ئەمریكا لەمیانی لێدوانیدا بۆ رۆژنامەنوسان لە كۆشكی سپی كاتێك پرسیاری ئەوەی لێكرا ئایا لەمیای سەردانەكەیدا بۆ سعودیە، چاوی بە ڤلادیمێر پوتین دەوێت، وتی، كاری بازرگانی پاڵنەری سەرەكی سەردانەكەیەتی.

ترەمپ وتی، لەماوەی خولی یەكەمی سەرۆكایەتی خۆیدا، سعودیە بەڵێنی دا كە بە بڕی 450 ملیار دۆلار بەرهەمی كۆمپانیا ئەمریكییەكان بكڕێت، بۆیە سەردانی ئەو وڵاتەم كرد.

وتیشی، ئێستا سعودییەكان زیاتر دەوڵەمەند بون، هەموشمان گەورەتر بوین، بۆیە وتم، سەردانی سعودیە دەكەم ئەگەر یەك ترلیۆن دۆلار بدەنە كۆمپانیا ئەمریكییەكان لەماوەی چوار ساڵی داهاتودا.

سەرۆكی ئەمریكا وتیشی، سعودییەكان رازی بون، بۆیە سەردانی سعودیە دەكەم، رەنگە سەردانەكە لەماوەی یەك مانگ و نیوی داهاتودا بێت.

ترەمپ ئاماژەی بەوەشدا، پەیوەندی باشم لەگەڵ بەرپرسانی سعودیە هەیە، ئەوان زۆر باشن و پارەیەكی زۆریش لە كۆمپانیا ئەمریكییەكاندا خەرج دەكەن بۆ كڕینی كەرەستەی سەربازی و زۆر شتی تریش.