روانگەی سوری بۆ مافەكانی مرۆڤ رایگەیاند، لە شەڕو پێكدادانەكانی نێوان گروپە چەكدارە عەلەوییەكان و هێزە ئەمنی و سەربازییەكانی سوریادا لە ناوچە كەناراوییەكانی سوریا، زیاتر لە 70 كەس كوژراون. دیمەشق بەرەبەیانی ئەمڕۆ هەینی، هێزی زیاتر رەوانە ئەو ناوچانە كردوە و باری نائاسایی لەوێ راگەیەندوە.
ئاوێنە: بەگوێرەی روانگەی شوری لە شەڕو پێكدادانەكان زیاتر لە 70 كەس كوژراون كە جەگە لە چەكدارانی هێزە ئەمنییەكان و گروپە چەكدارە عەلەوییەكان كەسانی مەدەنی هەن.
شەوی رابردو حكومەتی دیمەشق قەدەغەی هاتوچۆی لەو ناوچانەی شەڕو ئاڵۆزییان تێدابو راگەیاندو دەستی كرد بە ناردنی هێزی زیاتر بۆ ناوچەكان و ناردنی هێز تاوەكو بەرەبەیانی ئەمرۆ هەینی بەردەوام بوە.
شەڕەكان زیاتر لە ناوچە كەناراوییەكانی سوریا لە سنوری لازقیە و تەرتوس رویانداوە كە بەشێكی زۆری عەلەوییەكانی سوریا لەو ناوچانە نیشتەجێن.
بەقسەی چالاكوانانی عەلەوی، پێكهاتەكەیان لەدوای روخانی رژێمەكەی بەشار ئەسەدەوە، بەتایبەت لە ناوچە گوندەوارەكانی پارێزگای حمس و لازقیە، روبەڕوی توندوتیژی و هێرشی بەردەوام بۆتەوە.
سەرهەنگ حەسن عەبدولغەنی، وتەبێژی وەزارەتی بەرگریی سوریا هەڕەشەی لە چەكدارە عەلەوییەكان كردوە بەوەی كە یان چەكەكەیان رادەست بكەن یاخود روبەڕوی مەرگ دەبنەوە.
هەروەها ئەنەس خەتاب، سەرۆكی دەزگای هەواڵگری سوریا، باری نائاسایی لە ناوچە كەناراوییەكانی سوریا راگەیاندوەو وتویەتی، لەو ناوچانە هەر كەسێكی چەكداری سوری كە لە ریزەكانی هێزە ئەمنی و سەربازییەكانی حكومەتی دیمەشقدا نەبێت، مامەڵەی شەڕكەری دژبە حكومەت لەگەڵ دەكرێت و دەكرێتە ئامانج.
ئەو بەرپرسە سورییە بەوەشەوە نەوەستاوەو رایگەیاند، هەر پۆستێك لە تۆڕە كۆمەڵایەتییەكان كە هانی شەڕ لە دژی سوپای سوریاو هێزە ئەمنییەكان بدات و پشتیوانی لە چەكدارەكان بكات، خاوەنی پۆستەكە لەلایەن ئاسایس و وەزارەتی بەرگریی سوریا راستەوخۆ دەكرێتە ئامانج.