بەریتانیا سزاكانی وڵاتەكەی لەسەر بانكی ناوەندیی سوریا و 23 دامەزراوەی دیكەی ئەو وڵاتە هەڵدەگرێت.
ئاوێنە: بەپێی راگەیەندراوێك كە ئەمڕۆ پێنجشەممە، لە پێگەی حكومەتی بەریتانیا بڵاوكراوەتەوە، ئەو وڵاتە بڕیاریداوە بە هەڵگرتنی سزاكان لەسەر 24 دامەزراوەی سوریا.
لە راگەیەندراوەكەدا هاتوە، چیدی سەروەت و سامانی ئەو دامەزراوە سوریانە بلۆك كراو نین.
بەگوێرەی راگەیەندراوەكە لەنێو دامەزراوەكاندا، بانكی ناوەندی، بانكی بازرگانی و بانكی هاریكاریی كشتوكاڵیی سوریاو هەروەها كۆمپانیای نەوتی سوری، كۆمپانیای نەوتی بازرگانی سوری و كۆمپانیای ئۆڤەرسیز پترۆلیۆم هەن كە سزاكانیان لەسەر هەڵگیراوە.
ئەوەش لەكاتێكدایە كە لە مانگی رابردودا، وڵاتانی یەكێتی ئەوروپا بەشێك لە سزاكانی خۆیان لەسەر سوریا هەڵگرت.
لە مانگی شوباتی ئەمساڵ، حكومەتی بەریتانیا رایگەیاند، لەدوای روخانی رژێمەكەی ئەسەدەوە، پێداچونەوە بە سزاكانی سەر سوریادا دەكات بەڵام سزای بلۆككردنی سامان و قەدەغەی گەشت كە بەسەر ئەندامانی رژێمەكەی ئەسەددا سەپێندراون، هەڵناگیرێن.