رێکخراوی نەتەوە یەکگرتووەکان بڵاویکردەوە، لە ساڵی 2022 وە حاڵەتەکانی توندوتیژی سێکسی بە رێژەی 50% بەرزبووەتەوە و لە هەر 10 خولەکێکدا لە جیهاندا ژنێک دەکوژرێت.
بەبۆنەی نزیکبوونەوەی 8 ی مارس رۆژی جیهانیی ژنان رێکخراوی نەتەوە یەکگرتووەکان راپۆرتێکی بڵاوکردەوە کە تێیدا هاتووە، دوای تێپەڕبوونی 30 ساڵ بەسەر دانانی پلانی یەکسانی نێوان هەردوو رەگەز لەلایەن سەرکردەکانی جیهانەوە، هێشتا مافەکانی ژنان و کچان لەژێر هەڕەشەدایە، جیاکاری رەگەزی لە کۆمەڵگا جیاوازەکاندا چەسپاوە، یەک لەسەر چواری حکومەتەکانی جیهان لە مافەکانی ژناندا پاشەکشەیان کردووە.
هەر لە راپۆرتەکەدا هاتووە، لە هەر 10 خولەکێکدا لە جیهاندا ژنێک بە دەستی هاوسەر یان یەکێک لە ئەندامانی خێزانەکەی دەکوژرێت، لە ساڵی 2022 وە حاڵەتەکانی توندوتیژی سێکسی بە رێژەی 50% بەرزبووەتەوە، تەنها 87 وڵاتی جیهان لەلایەن ژنانەوە سەرکردایەتیی دەکرێن.