ئەمریكا و ئیسرائیل پلانەكەی وڵاتانی عەرەبی بۆ ئاوەدانكردنەوەی غەززە رەتدەكەنەوە
  2025-03-05       520       

ئەمریكا و ئیسرائیل، پلانی وڵاتانی عەرەبی بۆ ئاوەدانكردنەوەی غەززە رەتدەكەنەوە كە بەپێی پلانەكە خەڵكی غەززە لە شوێنی خۆیان دەمێننەوە.

ئاوێنە: دوێنێ سێشەممە، وڵاتانی عەرەبی لە راگەیەندراوی كۆتایی لوتكەی قاهیرە دەربارەی فەلەستین، رەتیان كردەوە فەلەستینییەكان لەژێر هیچ ناو و پاساوێكدا لە غەززە رابگوازرێن و ئەو پلانەی میسریشیان پەسەندكرد كە بە ئاوەدانكردنەوەی غەززە خرایەڕو و رایانگەیاند كە ئەوە پلانی گشتگیریی وڵاتانی عەرەبییە.

بەگوێرەی پلانی عەرەبی، غەززە لەدوای جەنگ بە بەهای 53 ملیار دۆلار ئاوەداندەكرێتەوەو غەززە بەشێوەیەكی كاتی لەلایەن لیژنەیەكی شارەزایانەوە بەڕێوەببرێت و هێزەكانی پاراستنی ئاشتی نەتەوە یەكگرتوەكان لە غەززە جێگیربكرێن.

پلانە عەرەبییەكە لەلایەن دەسەڵاتی فەلەستین و بزوتنەوەی حەماسەوە پێشوازی لێكرا. بەڵام كۆشكی سپیی ئەمریكا و وەزارەتی دەرەوەی ئیسرائیل پلانەكەیان وا وەسف كرد كە سەركەوتو نەبوە لە مامەڵەكردن لەگەڵ راستییەكانی غەززە و پشتیوانی خۆیشیان بۆ پلانەكەی ترەمپ لەبارەی غەززە دوپاتكردەوە.

وەزارەتی دەرەوەی ئیسرائیل لە كاردانەوەیدا بەرامبەر بە پلانەكە وتی، پلانەكە چارەسەری راستییەكی دۆخی غەززەی دوای 7ی ئۆكتۆبەر ناكات. جەختیشی كردەوە كە ئەوان لەگەڵ بیرۆكەكەی ترەمپدان لەبارەی غەززەوە.

هەروەها براین هیوز، وتەبێژی ئەنجومەنی ئاسایشی نەتەوەیی ئەمریكا لەبارەی پلانەكەی وڵاتانی عەرەبییەوە وتی، راستییەكان چارەسەر ناكات، غەززە بەكەڵكی نیشتەجێبون نایەت لە ئێستاداو جەختیشی لەسەر بیرۆكەكەی دۆناڵد ترەمپ كردەوە لەبارەی غەززە.

زۆرترین بینراو
© 2025 Awene Online, Inc. All Rights Reserved.
×