پێگەی "ئەكسیۆس"ی ئەمریكی بڵاویكردەوە، ئیدارەی ئەمریكا دانوستانی راستەوخۆ لەگەڵ بزوتنەوەی حەماس ئەنجام دەدات لەبارەی ئازادكردنی ئەو بارمتە ئەمركییانەی كە لە غەززە دەستبەسەرن.
ئاوێنە: بەپێی وتەی سێ سەرچاوەی ئاگادار كە قسەیان بۆ پێگەكە كردوە، ئادەم بوهلەر، نێردەی كۆشكی سپی بۆ كاورباری بارمتەكان، سەرۆكایەتی دانوستانەكان دەكات و ئەوەش هەنگاوێكی بێ پێشینەی ئەمریكایەو چونكە واشنتۆن تاوەكو ئێستا هیچ پەیوەندییەكی راستەوخۆی لەگەڵ حەماس نەبوە.
ئەمریكا لەساڵی 1997ەوە بزوتنەوەی حەماسی وەك رێكخراوێكی تیرۆریستی ناساندوە.
ئاماژە بەوەشدراوە، بوهلەر و بەرپرسانی حەماس لەماوەی چەند هەفتەی رابردودا لە دەوحەی پایتەختی قەتەر چەند كۆبونەوەیەكیان ئەنجامداون و دانوستانەكانیان لەبارەی ئازادكردنی بارمتە ئەمریكییەكانی لای حەماس بوە.
ئەوەش خراوەتەڕو، هەر لە كۆبونەوەكاندا گفتوگۆ لەبارەی گەیشتن بە رێككەوتنێكی گشتگیركراوە كە ئازادكردنی سەرجەم بارمتەكان لەخۆبگرێت لەگەڵ ئاگربەستێكی درێژخایەن، بەڵام تاوەكو ئێستا نەگەیشتونەتە رێككەوتن.
تاوەكو ئێستا 59 بارمتە لای حەماس ماون، كە پێنجیان ئەمریكین. سوپای ئیسرائیل رایگەیاندوە كە 35 بارمتەیان كوژراون.