حووسییەکانی یەمەن ڕایگەیاند، فڕۆکەیەکی بێفڕۆکەوانی ئەمەریکیان خستۆتە خوارەوە، کە بە وتەی خۆیان فڕۆکەکە لە جۆری MQ-9 یە، دوای ئەوەی ئاسمانی یەمەنی بەزاندووە، پێکاویانە.

ئاوێنە: لەمبارەیەوە یەحیا سەریع، وتەبێژی چەکدارە حوسییەکانی یەمەن کە سەر بە ئەنساڕوڵڵان، ڕایگەیاند، بەرگرییە ئاسمانی هێزەکانیان سەرکەوتوو بووە لە خستنەخوارەوەی درۆنێکی ئەمەریکی جۆری MQ-9، لە کاتێکدا کە لە سنووری پارێزگای حودەیدە ئاسمانی یەمەنی بەزاند.

ناوبراو وتویەتی : لە دوای 7ی ئۆکتۆبەری 2023ـەوە لەوەتەی حووسییەکان پشتیوانی لە کەرتی غەززە دەکەن، ئەمە 15مین فڕۆکەیە لەلایەن بەرگریی ئاسمانی یەمەن دەخرێتە خوارەوە.

هەرچەندە وەزارەتی بەرگری و ناوەندی فەرماندەیی هێزەکان ئەمەریکا ناسراو بە سێنتکۆم، هیچ ڕاگەیەندراوێک دەرباری ئەم درۆنە سەربازییە بڵاو نەکردووەتەوە، بەڵام نووسینگەی گوتەبێژی وەزارەتی دەرەوەی ئەمەریکا لە ڕاگەیەندراوێکی ڕۆژنامەوانیدا ئاماژەیداوە، بە بڕیاری دۆناڵد ترەمپ، سەرۆکی ئەمەریکا، بزووتنەوەی ئەنساڕوڵڵای یەمەن، خرایە لیستی ڕێکخراوە تیرۆریستییە بیانییەکان.