لە كۆبوونەوەی لوتكەی عەرەبی لە قاهیرە، دوێنێ پلانی میسر بۆ ئاوەدانكردنەوەی كەرتی غەزە پەسەند كرا، كە بڕیارە لە ماوەی پێنج ساڵدا غەزە ئاوەدان بكرێتەوە، هەروەها لوتكەی عەرەبی دژی گواستنەوە و ئاوارەكردنی خەڵی غەزە بوون.
ئاوێنە: ئەحمەد ئەبو غیس، ئەمینداری گشتیی كۆمكاری عەرەبی سەبارەت بە پەسەندكردنی پلانەكەی میسر بۆ غەزە لە كۆنگرەیەكی ڕۆژنامەوانیدا زانیاری نوێی خستەڕوو.
ئەحمەد ئەبو غیس ڕایگەیاند، پلانەكەی میسر ڕێگایەكی نوێی سیاسی و ئەمنی لە غەزە دادەنێت، بەجۆرێك ئاوەدانكردنەوەی كەرتی غەزە لە ماوەی پێنج ساڵدا بەپێی قۆناغە دیاریكراوەكان دەبێت.
ئاماژەی بەوەشكرد، دوای پەسەندكردنی پلانەكە لە لوتكەكەدا، پلانی میسر گۆڕا بۆ پلانێكی عەرەبی، چونكە پەیوەندی نێوان كەرتەكانی غەزە دەپارێزێت، هەروەها نوێنەرایەتی بەدیلێكی واقیعی دەكات، بۆ ئاوەدانكردنەوەی غەزە بەبێ ئاوارەكردنی خەڵكەكەی.
باسی لەوەشكرد، بەیاننامەی كۆتایی لوتكەكە ئەولەویەتەكانی تەواوكردنی ئاگربەستەكە پشتڕاست دەكاتەوە، كە لەژێر تەحەدای گەورەدایە، هەروەها داوا لە ئەنجوومەنی ئاسایش دەكەین، هێزی ئاشتیپارێزی نێودەوڵەتی لە كەرتی ڕۆژئاوا و غەزە جێگیر بكات.
جێگای ئاماژەیە، دوێنێ سەرۆكی وڵاتانی عەرەبی لە قاهیرەی پایتەختی میسر كۆبوونەوە و دۆخی وڵاتانی عەرەبی و بەتایبەتی غەزەیان تاوتوێكرد، سەرۆككۆماری عێراقیش بەشداریی كۆبوونەوەی لوتكەی عەرەبی بوو.