ڤلۆدیمێر زیلینسکی سەرۆکی ئۆکرانیا وێڕای ئەوەی سوپاسگوزاری سەرۆکی ئەمریکایە و دەشڵێت "ئەوەی لە كۆشكی سپی روویدا جێی داخەو راستی دەكەینەوە"، ناوبراو دەشڵێت "ئامادەم لەژێر سەرکردایەتی بەهێزی سەرۆک ترەمپ کاربکەم بۆ بەدەستهێنانی ئاشتییەکی بەردەوام".
ئاوێنە: ڤلۆدیمێر زیلینسکی، سەرۆكی ئۆكرانیا لەمیانی نوسراوێکیدا لە پلاتفۆڕمی (ئێکس) رایدەگەیەنێت "کۆبونەوەکەمان رۆژی هەینی لە کۆشکی سپی، لە واشنتۆن، بەوشێوەیە نەڕۆیشت کە بڕیار بوو، بەداخەوە کە بەو شێوەیە روویدا، کاتی ئەوە هاتووە شتەکان راست بکەینەوە، هیوادارین هاوکاری و پەیوەندییەکانی داهاتوو بنیاتنەر بن".
زیلینسکی دەشنوسێت "ئەو کارانە بەرز دەنرخێنین كە ئەمریکا کردوویەتی، بۆ پاراستنی سەروەری و سەربەخۆیی ئۆکرانیا، ئەو ساتەمان لەبیرە کە شتەکان گۆڕا، کاتێک سەرۆک ترەمپ چەکی دابینکرد بۆ ئۆکرانیا، ئێمە سوپاسگوزارین بۆ ئەوە".
ناوبراو باسیشی لەوەکردووە "ئۆکرانیا ئامادەیە بەزووترین کات لەسەر مێزی دانوستان دابنیشێت، بۆ بەدەستهێنانی ئاشتییەکی بەردەوام"، ئەو دەشڵێت "من و تیمەکەم ئامادەین لەژێر سەرکردایەتی بەهێزی سەرۆک ترەمپ کاربکەین بۆ بەدەستهێنانی ئاشتییەکی بەردەوام".
سەرۆکی ئۆکرانیا وتوشیەتی "ئامادەشین بەخێرایی کاربکەین بۆ کۆتاییهێنان بە جەنگ، قۆناغی سەرەتاش دەکرێت ئازادکردنی دیلەکان بێت، ئاگربەست لە ئاسمانیش بە قەدەغەکردنی موشەکی دوور مەودا و فڕۆکەی بێفڕۆکەوان، هەروەها ئاگربەستی دەستبەجێ لە دەریادا، ئەگەر روسیاش هەمان شت بکات، ئەوا ئێمە دەمانەوێت زۆر بەخێرایی هەنگاو بنێن لە هەموو قۆناغەکانی داهاتوودا و لەگەڵ ئەمریکا کاربکەین بۆ گەیشتن بە ڕێککەوتنێکی کۆتایی".
سەبارەت بە رێککەوتنی کانزاکان و ئاسایش، ڤلۆدیمێر زیلینسکی ئاشکراشیکردووە "ئۆکرانیا ئامادەیە بۆ واژوكردنی لەهەرکاتێکدا و بەهەر چوارچێوەیەكی گونجاو، ئێمە ئەم رێککەوتنە وەک هەنگاوێک دەبینین بەرەو ئاسایش زیاتر و گەرەنتیكردنی ئاسایش".
