دۆناڵد ترەمپ، سەرۆكی ئەمریكا رایگەیاند، پلانیان هەیە بۆ ئەوەی ڤیزایەكی نوێ بەناوی "كارتی زێڕین" بە سەرمایەدارانی جیهان بفرۆشن و نرخەكەشی نزیكەی پێنج ملیۆن دۆلار دەبێت و رێگەیەكیشە بۆ وەرگرتنی رەگەزنامەی ئەمریكی.

ئاوێنە: دۆناڵد ترەمپ، بە رۆژنامەنوسان وتی، پلانی ئەوەی هەیە بەرنامەی ڤیزا ڤیزای بۆ وەبەرهێنەرانی بیانی "ئی بی5" دەگۆڕێت بە ڤیزایەكی نوێ لەژێر ناوی "كارتی زێڕین".

وتیشی، كارتی زێڕین دەفرۆشین و نرخێكی لەسەر دادەنێین كە نزیكەی 5 ملیۆن دۆلار دەبێت.

ئاماژەی بەوەشدا، كارتە زێڕینەكە، تایبەتمەندی گرین كارتی دەبێت و رێگەیەكیشە بۆ بەدەستهێنانی رەگەزنامەی ئەمریكی و كەسانی دەوڵەمەند بە كڕینی ئەو كارتە دێنە وڵاتەكەمان.

ئەوەش خستەڕو، لە دو هەفتەی داهاتودا وردەكارییەكانی ئەو پلانە بڵاودەكەنەوە.

ترەمپ لە وەڵامی ئەوەی كە ئایا "ئۆلیگارشییەكان"ی روسیا دەتوانن ئەو كارتە زێڕینە بكڕێن، وتی"بەڵێ دەتوانن. من هەندێك لە ئۆلیگارشە روسەكان دەناسم كەسانی زۆر باشن."