فەرماندەیەکی باڵای هێزە چەکدارەکانی ئێران هۆشداریدا کە تاران وەڵامێکی یەکلاکەرەوە ئاڕاستەی هەر هەڕەشەیەکی ئیسرائیل یان ئەمریکا دەکات کە بەرژەوەندییەکانی ئێران بکاتە ئامانج.
ئاوێنە: ژەنەڕاڵ غوڵام عەلی ڕەشید، فەرماندەی ژوری ئۆپەراسیۆنی هێزه چەکداره‌كانی ئێران ڕایگه‌یاند، "هەر هەڕەشەیەکی قەوارەی زایۆنیستی دژ بە بەرژەوەندییەکانی ئێران بە پشتبەستن بە پشتیوانی ئەمریکا بۆ ئێران هەڵدەسەنگێندرێت و بە ڕێوشوێنی یەکلاکەرەوە لەلایەن هێزە چەکدارەکانەوە وەڵام دەدرێتەوە".
ئاماژەی بەوەشکرد، "سەرچاوەی دەستدرێژییەکە دەکەینە ئامانج، هەروەها ئەو ئاسانکاری و بنکانەی کە پشتگیری ئیسرائیل دەکەن یان به‌جۆرێك به‌كارده‌هێنرێن ده‌بنه ئامانجی هێزه‌كانمان".
هەفتەی ڕابردو بنیامین نه‌ته‌نیاهۆ، سەرۆک وەزیرانی ئیسرائیل لە کۆنگرەیەکی ڕۆژنامەوانی هاوبەشدا لەگەڵ مارکۆ ڕوبیۆ، وەزیری دەرەوەی ئەمریکا ڕایگەیاند، ئیسرائیل لە سەرەتای دەستپێکردنی شەڕی غەززەوە "زیانێكی بەهێزی لە ئێران داوە و بە پاڵپشتی دۆناڵد ترەمپ، سەرۆکی ئەمریکا هیچ گومانێکم نییە کە دەتوانین و ئەرکەکە زیاتر بە ئەنجام بگەیەنین".
دەزگای هەواڵگری ئەمریکا هۆشداریدا لەوەی ئیسرائیل بیر لە ئەنجامدانی هێرشی گەورە بۆ سەر دامەزراوە ئەتۆمییەکانی ئێران دەکاتەوە لە ماوەی نیوەی یەکەمی ئەمساڵدا، بە کەڵک وەرگرتن لەو دۆخە لاوازەی کە ئێران توشی دەبێت.
هەفتەی ڕابردو دۆناڵد ترەمپ، سەرۆکی ئەمریکا ئەگەری بۆردومانی ئیسرائیلی بۆ سه‌ر ئێرانی وروژاند، بەڵام ڕایگەیاند، پێی باشترە ڕێککەوتنێک لەگەڵ ئێران ئەنجامبدات کە ڕێگری لە دروستکردنی چەکی ئەتۆمی بکات.
تاران خۆی لەبەردەم بژاردەی دانوستان لەگەڵ ترەمپ دەبینێتەوە، ئەوەش لە کاتێکدایە كه له ڕۆژهه‌ڵاتی ناوه‌ڕاستدا ڕوبه‌ڕوی پاشه‌كشه بوه‌ته‌وه و له ناوخۆشدا ڕوبه‌ڕوی قه‌یرانی ئابوری و فشار بوه‌ته‌وه.
شرۆڤەکاران ئەوە دوپاتدەکەنەوە کە تاران ناچارە دانوستان لەگەڵ ترەمپ بکات، بەتایبەتی دوای دابەزینی "میحوەری بەرخۆدان" لە ئەنجامی هەڵوەشاندنەوەی هاوپەیمانەکانی و ڕوخانی ئەسەد و لێدانەکانی حزبوڵای لوبنانی.
تره‌مپ پێیوایە دابەزینی دەسەڵاتی سەربازی ئێرانی خستوه‌تە پێگەیەکی بەرگری لاوازەوە، ئەوەش ئەگەری پەنابردنە بەر مێزی دانوستان زیاددەکات.