مەسعود بارزانی، سەرۆكی پارتی رایدەگەیەنێت، رەفتارەكانی ئەمڕۆی هێزەكانی سوپای عێراق بەرامبەر بە جوتیارانی كورد لە سنوری كەركوك،  "رەفتارێكی شۆڤینیانەیە" و داواش لە سەرۆك وەزیرانی عێراق دەكات، رێگری لە دوبارەبونەوەی ئەو زوڵمە بكرێت و ئەنجامدەرانی ئەو تاوانە دەستگیربكرێن و سزای یاسایی خۆیان وەربگرن.

ئاوێنە: مەسعود بارزانی، سەرۆكی پارتی، ئەمشەو دوشەممە، لە پەیامێكدا رایگەیاند"دیمەنی ئازاردانی جوتیارانی كوردو ڕەفتاری نابەجێی ڕێگریكردن لە جوتیارانی كورد كە بچنەوە سەر زەوییەكانیان، دیمەنی ئەنفال و كیمیاباران و جینۆسایدی ڕۆڵەكانی گەلەكەمان لە سەدەی پێشو بەبیردەهێنێتەوە."

وتوشیەتی"ئەمە ڕەفتارێكی شۆڤینیانەو بێویژدانانەو تاوانە لەدژی جوتیارە بێتاوانەكانی كورد لە پارێزگای كەركوك دەكرێت كە تەنیا تاوانیان ئەوەیە كوردن و خاوەنی ڕەسەنی زەوییەكانیانن."

مەسعود بارزانی ئاماژەی بەوەشداوە "داوا لە بەڕێز محەمەد شیاع سودانی سەرۆكوەزیرانی عێراقی فیدڕاڵ دەكەم ڕێگری لە دوبارەبونەوەی ئەو زوڵمە بكرێت و ئەنجامدەرانی ئەو تاوانە دەستگیربكرێن و سزای یاسایی خۆیان وەربگرن."

سەرۆكی پارتی هێمای بۆ ئەوەش كردوە كە جوتیارانی كورد "تەنیاو بێ پشت و پەنا نین و بەهەمو هێزێك پشتیوانی لە خۆڕاگری و ماف و داواكانیان دەكەین."

دەقی پەیامەكە:

بەناوی خودای مەزن و دلۆڤان

دیمەنی ئازاردانی جوتیارانی كوردو ڕەفتاری نابەجێی ڕێگریكردن لە جوتیارانی كورد كە بچنەوە سەر زەوییەكانیان، دیمەنی ئەنفال و كیمیاباران و جینۆسایدی ڕۆڵەكانی گەلەكەمان لە سەدەی پێشو بەبیردەهێنێتەوە. ئەمە ڕەفتارێكی شۆڤینیانەو بێویژدانانەو تاوانە لەدژی جوتیارە بێتاوانەكانی كورد لە پارێزگای كەركوك دەكرێت كە تەنیا تاوانیان ئەوەیە كوردن و خاوەنی ڕەسەنی زەوییەكانیانن.

لێرەدا داوا لە بەڕێز محەمەد شیاع سودانی سەرۆكوەزیرانی عێراقی فیدڕاڵ دەكەم ڕێگری لە دوبارەبونەوەی ئەو زوڵمە بكرێت و ئەنجامدەرانی ئەو تاوانە دەستگیربكرێن و سزای یاسایی خۆیان وەربگرن. 

دەستخۆشیش لەو كوردە قارەمانانە دەكەم كە لەبەرانبەر ئەو ستەم و دەستدرێژییە خۆڕاگر بونەو با باش بزانن كە ئەوان تەنیاو بێ پشت و پەنا نین و بەهەمو هێزێك پشتیوانی لە خۆڕاگری و ماف و داواكانیان دەكەین.

مەسعود بارزانی

17ی شوباتی 2025