بنیامین نەتەنیاهۆ، سەرۆك وەزیرانی ئیسرائیل رایگەیاند، ئیسرائیل و ئەمریكا پێكەوە روبەڕوی هەڕەشەكانی ئێران دەبنەوە و دەشڵێت، لەماوەی 16 مانگی رابردودا گورزی گەورەیان لە باڵەكانی ئێران داوە لە ناوچەكەدا و جەختیش دەكاتەوە كە ئەو ئەركە تەواو دەكەن.
ئاوێنە: ئەو قسانەی بنیامین نەتەنیاهۆ، ئەمڕۆ یەكشەممە، لەمیانی كۆنگرەیەكی رۆژنامەوانیدا هاوبەشدا هاتن لەگەڵ ماركۆ رۆبیۆ، وەزیری دەرەوەی ئەمریكا كە بەسەردانێك لە ئیسرائیلە.
سەرۆك وەزیرانی ئیسرائیل وتی، لەماوەی 16 مانگی رابردودا، ئیسرائیل گورزەی گەورەی لە باڵەكانی ئێران لە ناوچەكە وەشاندوە. وتیشی، بە پشتیوانی ئەمریكا هیچ گومانم نییە لەوەی كە دەتوانین ئەو ئەركەمان تەواو بكەین.
وتیشی، ئیسرائیل و ئەمریكا شان بەشانی یەكتری دەوەستن بۆ روبەڕوبونەوەی هەڕەشەكانی ئێران.
لای خۆیشییەوە وەزیری دەرەوەی ئەمریكا جەختی كردەوە كە ئێران بەهیچ شێوەیەك نابێتە هێزێكی ئەتۆمی و وتیشی، تاران گەورەترین هۆكاری ناسەقامگیرییە لە رۆژهەڵاتی ناوەڕاست.
وتیشی، قسەمان لەسەر حەماس بێت یان حزبوڵا، یاخود توندوتیژییەكان لە كەرتی خۆراوا، یان ناسەقامگیرییەكانی سوریاو میلیشیاكانی عێراق، لەپشت هەمو ئەمانەوە یەك لایەن وەستاوە كە ئەویش ئێرانە.