ڕۆژنامەی ۆڵ ستریت جۆرناڵ بڵاوی كردەوە، دەزگای هەواڵگریی ئەمریكا زانیاریی هەیە، كە ئیسرائیل پلانی هێرشكردنە سەر دامەزراوە ئەتۆمییەكانی ئێرانی داناوە، دەشڵین، ئەمریكا هۆشداری دەدات لەوەی ڕەنگە ئەو هێرشانە گرژییەكانی ڕۆژهەڵاتی ناوەڕاست زیاد بكات.
ئاوێنە: ڕۆژنامەی ۆڵ ستریت جۆرناڵ، بەپشت بەستن بە زانیاری ئەو كەسانەی كە خاوەنی زانیاری هەواڵگریین، هەواڵێكی سەبارەت بە ئامادەكاری ئیسرائیل بۆ هێرشكردنە سەر ئێران، بڵاوكردەوە، هەواڵگریی ئەمریكا ڕاپۆرتێكی ئامادەكردووە و زانیاری ئەوەی تێدایە، كە ئیسرائیل خۆی بۆ هێرشكردنە سەر ئێران ئامادە كردووە.
ئاماژە بەوەشكراوە، ژێرخانی سەربازیی ئێران لاواز بووە و هۆشداری ئەوەیش دراوە كە ڕەنگە چالاكییە سەربازییەكانی لە ڕۆژهەڵاتی ناوەڕاستدا زیاد بكات، هەروەها لە یەكەم ڕۆژەكانی هاتنە سەر دەسەڵاتی دۆناڵد ترەمپ وەك سەرۆكی ئەمریكا، ئیسرائیل لە ئامادەكارییدایە، بۆ هێرشكردنە سەر دامەزراوە ئەتۆمییەكانی ئێران.
باس لەوەشكراوە، ئیسرائیل پلانی ئەنجامدانی هێرشی گرنگیی هەیە، بۆ سەر دامەزراوە ئەتۆمییەكانی ئێران بە مەبەستی لاوازكردنی پێگەی ئێران، لە ئێستادا ئەگەری پشتیوانی ترەمپ بۆ هێرشەكە بەراورد بە سەردەمی بایدن زیاترە، لەبەرئەوەی ئیسرائیل گوشار لە ئیدارەی ترەمپ دەكات بۆ پشتیوانی.
جێگای ئاماژەیە، لە چەند ڕۆژی ڕابردوودا ئێران مانۆڕێكی گەورەی سەربازی ئەنجامدا و تیایدا چەندین جۆری چەكی پێشكەوتوو و سیستەمی بەرگری نوێی لە دامەزراوە ئەتۆمییەكانی نمایش كرد، ئەوەش لەچوارچێوەی ئامادەكارییەكانی ئەو وڵاتەدایە بۆ ڕووبەڕووبوونەوەی هەر هێرشێكی ئیسرائیل بۆ سەر دامەزراوە ئەتۆمییەكانی.