بزوتنەوەی حەماس رایگەیاند، ئازادكردنی ئەو بارمتە ئیسرائیلییانە رادەگرێت كە بڕیاربو رۆژی شەممەی داهاتو رادەستیان بكات. لەبەرامبەریشدا ئیسرائیل سوپاكەی دەخاتە ئەوپەڕی حاڵەتی ئامادەباشییەوە بۆ ئەگەر هەر سیناریۆیەك.
ئاوێنە: ئەبو عوبەیدە، وتەبێژی رەسمی باڵی سەربازیی بزوتنەوەی حەماس، ئەمڕۆ دوشەممە، رایگەیاند، تا كاتێكی نادیار ئازادكردنی ئەو بارمتە ئیسرائیلییانە رادەگرن كە بڕیاربو رۆژی شەممەی داهاتو رادەست بكرێن.
ئەبو عوبەیدە لە راگەیەندراوێكدا لەوبارەیەوە ئیسرائیلی تۆمەتبار كرد بەوەی كە لەماوەی سێ هەفتەی رابردودا، پێشێلی بڕگەكانی رێككەتننامەی ئاگربەستی كردوە بەوەی كە بۆتە مایەی دواكەوتنی گەڕانەوەی ئاوارەكان بۆ كەرتی غەززەو بۆردومانكردنیان و هەروەها رێگە نەدان بە گەیشتنی كەرەستەی فریاگوزاری و مرۆیی بۆ غەززە بەو شێوەیەی كە لەسەری رێككەوتون.
ئەو جەختیشی كردەوە كە رادەستكردنی بارمتەكان دوادەخرێت تا ئەو كاتەی ئیسرائیل پابەند دەبێت بە رێككەوتنی ئاگربەست و قەرەبوكردنەوەی ئیستیحقاقی هەفتەكانی رابردو. وتیشی، حەماس پابەندبوە بە بڕگەكانی رێككەوتنی ئاگربەستەوە.
لەبەرامبەر ئەوەدا یەسرائیل كاتز، وەزیری بەرگری ئیسرائیل رایگەیاند، حەماس پێشێلی تەواوەتی رێككەوتنی ئاگربەست و رێككەوتنی ئازادكردنی بارمتەكان دەكات.
وتیشی، رێنماییان بۆ سوپای ئیسرائیل دەركردوە كە لەوپەڕی ئامادەباشیدا بن بۆ ئەگەری هەر سیناریۆیەك لە غەززە.