ڕۆژنامەیەكی ئەمریكی بڵاوی كردەوە، محەمەد جۆلانی سەرۆكی دەستەی تەحریر شام ڕووبەڕووی ئاستەنگی گەورە دەبێتەوە، وڵاتەكەش دووچاری وێرانكاری و بێ خزمەتگوزاری بووەتەوە، پێویستە حكومەتی سووریا خۆی لە درووستكردنی قەیرانی نوێی سیاسی بەدوور بگرێت.
ئاوێنە: ڕۆژنامەی واشنتۆن پۆستی ئەمریكی سەبارەت بە ئاستەنگ و ئاڵنگاری بەردەم محەمەد جۆلانی سەرۆكی دەستەی تەحریر شام لە ئێستا و داهاتوودا راپۆرتێكی بڵاوكردەوە کە تیایدا ھاتووە، محەمەد جۆلانی سەرۆكی دەستەی تەحریر شام ڕووبەڕووی ئاستەنگی گەورە دەبێتەوە، وڵاتەكەش دووچاری وێرانكاری و بێ خزمەتگوزاری بووەتەوە، گەنجینەی دەوڵەت لە سووریا بەتاڵە، ئەوەش وادەكات بوژانەوەی ئابووری مەحاڵ بێت ئەگەر كۆمەك و یارمەتی دەرەكی پێنەگات.
ئاماژە بەوەشكراوە، پێویستە دیمەشق هەنگاو بەرەو سەقامگیری بنێت و خۆی لە قەیرانی سیاسی بەدوور بگرێت، چونكە هێشتا ئەو وڵاتە لەژێر كۆت و بەندی سزاكانی خۆرئاوادا گیری خواردوە.
هەروەها لەلایەن ئێرانیشەوە ڕەوانەكردنی نەوت بۆ سووریا ڕاگیراوە، كە لەڕێگەیەوە كارەبا بەرهەم دەهێنرا، هەربۆیە ئەوەش كاریگەری لەسەر ئاستی بەرهەمهێنانی كارەبا كردووە، بەشێكی فراوانی دیمەشقی پایتەخت بێ كارەبایە.
ئەوەش خراوەتەڕوو، لەبەر ئەوەی سووریا چەندین قەیرانی فراوانی هەیە، پێویستە لەسەر حكومەت خۆی لە درووستكردنی قەیرانی نوێی سیاسی بەدوور بگرێت و هەوڵی چارەسەركردنی ئەو كێشە و گرفتانەش بدات، كە لە ڕژێمی پێشوەوە بەجێماون.
جێگەی ئاماژەیە، ٨ی كانوونی دووەمی ساڵی ڕابردوو گرووپە چەكدارەكان بە سەرۆكایەتی محەمەد جۆلانی سەرۆكی دەستەی تەحریر شام كۆتاییان بە ڕژێمەكەی ئەسەد هێنا، بەڵام هێشتا چارەنووسی حكومەتی داهاتووی سووریا دیار نییە.