بەپێی ئامارەكانی تەندروستی رۆژاڤا، لەماوەی 22 رۆژی رابردودا، 41 هاوڵاتی مەدەنی بەهۆی هێرشەكانی توركیاو میلیشیاكانی سەربەو وڵاتەوە، لە ناوچە جیاجیاكانی رۆژاڤای كوردستان شەهیدبون و 245 هاوڵاتی دیكەش برینداربون.
ئاوێنە: تەندروستی رۆژاڤای كوردستان، لە ئامارێكدا بڵاویكردۆتەوە، لە 8ی ئەم مانگەوە تاوەكو دوێنێ پێنجشەممە، 41 هاوڵاتی مەدەنی لە ناوچە جیاجیاكانی رۆژاڤای كوردستان بەهۆی هێرشەكانی توركیاو گروپە چەكدارەكانی هاوپەیمانی ئەو وڵاتەوە شەهیدبون و 245 هاوڵاتیش برینداربون.
بەگوێرەی ئامارەكە، لەو ژمارەیە 24 هاوڵاتی مەدەنییان لەسەر بەنداوی تشرین شەهیدبون لەگەڵ برینداربونی 221 هاوڵاتی مەدەنی لەسەر بەنداوەكە.
هەر بەپێی ئامارەكە لەنێو بریندارەكاندا 7 رۆژنامەنوس و 6 كارمەندی تیمە تەندروستییەكان هەن.
هەروەك لەنێو قوربانییەكاندا ژمارەیەك منداڵ و ژن هەبون.