سوپای ئه‌مریكا ڕایگه‌یاند، دره‌نگانی شه‌وی پێنجشه‌ممه له هێرشێكی ئاسمانیدا له باكوری ڕۆژئاوای سوریا سه‌ركرده‌یه‌كی باڵای گروپێكی چه‌كداری سه‌ر به قاعیده‌یان كوشتوه.
ئاوێنە: فه‌رمانده‌یی ناوه‌ندیی ئه‌مریكا له راگه‌یه‌ندراوێكدا ئاماژه‌ی به‌وه‌كردوه، ئه‌و هێرشه ئاسمانییه كه له چوارچێوه‌ی هه‌وڵه به‌رده‌وامه‌كاندایه بۆ تێكشكاندن و لاوازكردنی گروپه چه‌كداره‌كانی ناوچه‌كه، بوه هۆی كوژرانی محه‌مه‌د سه‌ڵاح زوبه‌یر سه‌ركرده له گروپی پارێزه‌رانی ئایین كە سەر بە رێكخراوی قاعیدە بوە.
ئاماژەی بەوەشداوە، ئه‌م هێرشه ئاسمانییه به‌شێكه له پابه‌ندبونی به‌رده‌وامی فه‌رمانده‌یی ناوه‌ندی ئه‌مریكا شانبه‌شانی هاوبه‌شه ناوچه‌ییه‌كان بۆ تێكشكاندن و له‌ناوبردنی هه‌وڵه‌كانی تیرۆریستان بۆ پلاندانان و ڕێكخستن و جێبه‌جێكردنی هێرشه‌كان دژی هاوڵاتیانی مه‌ده‌نی و كارمه‌ندانی سه‌ربازی ئه‌مریكا، هاوپه‌یمانه‌كانمان و هاوبه‌شه‌كانمان له سه‌رتاسه‌ری ناوچه‌كه و ده‌ره‌وه‌ی وڵات.