نووسینگەى بنیامین نەتانیاهوو، سەرۆکوەزیرانی ئیسرائیل درەنگانی یەکشەممە رایگەیاند، دوای دانوستان لەگەڵ حەماس، بزووتنەوە فەڵەستینییەکە رۆژی پێنجشەممە سێ بارمتە و شەممەش سێ بارمتەی دیکە ئازاد دەکات، لە بەرامبەر رێگەدان بە گەڕانەوەی ئاوارەکانى غەززە بۆ بەشی باکووری کەرتەکە.

ئاوێنە: نووسینگەی نەتانیاهوو لە راگەیەندراوێکدا گوتى "دوای دانوستانێکی چڕ و یەکلاکەرەوە، حەماس رۆژی پێنجشەممە سێ بارمتە ئازاد دەکات کە ئەوانیش ئاربیل یەهود، ئاگام بێرگەرى سەرباز و بارمتەیەکی دیکە".

هەروەها بڕیارە رۆژی شەممە سێ بارمتەی دیکە ئازاد بکرێن، ئەوەش لە چوارچێوەى قۆناغی یەکەمی رێککەوتنی ئاگربەستی نێوان ئیسرائیل و حەماسدایە.

لە راگەیەندراوەکەى نووسینگەی نەتانیاهوودا هاتووە "ئیسرائیل لیستێکی لە بزووتنەوەی حەماسەوە پێگەیشتووە کە دۆخی هەموو بارمتەکان روون دەکاتەوە" کە دەکرێت لە قۆناغی یەکەمدا ئازاد بکرێن، چ بە زیندوویى یان بە مردوویى. دوای ماوەیەکی کەم، حەماس پشتڕاستی کردەوە کە لیستەکەی پێشکەش بە ناوبژیوانانی میسڕ و قەتەر کردووە.

سەرچاوەیەک لە کەتیبەکان عیزەدین قەسام، باڵی چەکداری حەماس، بە تەلەڤزیۆنی ئەقسای بزووتنەوەکەی راگەیاندووە، زیادبوونی ژمارەی بارمتە ئازادکراوەکان "بە دەستپێشخەری مقاوەمە بووە".

بەگوێرەى نووسینگەی نەتانیاهوو، ئیسرائیل لە چوارچێوەی "ئەم رێکارەدا" لەبەیانی ئەمڕۆ دووشەممەوە رێگە بە دانیشتووانی غەززە دەدات بپەڕنەوە بۆ باکووری کەرتەکە.

زۆرینەى دانیشتووانە دوو ملیۆن و 400 هەزار کەسییەکەى غەززە ئاوارەبوون، بەهۆى ئەو جەنگەى دوای هێرشی حەماس لە باشووری ئیسرائیل لە 7حەوتى تشرینی یەکەمی 2023 سەریهەڵدا.