دۆناڵد ترەمپ، سەرۆكی ئەمریكا رایگەیاند، هیوادارم پرسی ئەتۆمی ئێران بەبێ ئەوەی ئیسرائیل ناچار بێت هێرش بكاتە سەر دامەزراوە ئەتۆمییەكانی ئەو وڵاتە، چارەسەر بكرێت.
ئاوێنە: بەپێی میدیاكانی ئەمریكا، ئەو قسانەی دۆناڵد ترەمپ، دوێنێ پێنجشەممە، لەلێدوانێكدا هاتون بۆ رۆژنامەنوسان لەدوای ئیمزاكردنی زنجیرەیەك فەرمان لە كۆشكی سپی.
لە دۆناڵد ترەمپ پرسیاری ئەوە كرا كە ئایا پشتیوانی لە هێرشی ئیسرائیل بۆ سەر دامەزراوە ئەتۆمییەكانی ئێران دەكات، ئەو وتی، "من وەڵامی ئەم پرسیارە نادەمەوە" و ئاماژەی بەوەشدا كە بەمزوانە لەوباریەوە قسە لەگەڵ بەرپرسانی باڵا لە ئیدارەكەی دەكات.
لەگەڵ ئەوەش وتی"هیوادارم ئەم پرسە بەبێ نیگەرانی چارەسەر بكرێت. شتێكی باش دەبێت ئەگەر بكرێت بەبێ هەنگاوێكی لەوجۆرە ئەم پرسە چارەسەر بكرێت."
ئاماژەی بەوەشداوە، هیوادارم ئێران دەست بكات بە دانوستان و ئەگەر واش نەكات ئەوە شتێكی ئەوتۆ نابێت.
ئەوەش لەكاتێكدایە كە بەشێك لە ئیسرائیلییەكان پێیانوابو كە بە گەڕانەوەی دۆناڵد ترەمپ بۆ كۆكشی سپی، ناوبراو پشتیوانی لە هێرشی ئیسرائیل بۆ سەر دامەزراوە ئەتۆمییەكانی ئێران دەكات و تەنانەت رەنگە ئەمریكا خۆی ئەو هێرشە ئەنجام بدات.
ترەمپ لە مانگی ئۆكتۆبەری رابردو و لەمیانی كەمپەینی هەڵبژاردنەكاندا رەخنەی لە بایدن گرت و وتی، دامەزراوە ئەتۆمییەكانی ئێران دەبێت لێیان بدرێت.
بە بڕوای ترەمپ دەبو جۆ بایدن بیوتایە "یەكەمجار هێرش بكەنە سەر دامەزراوە ئەتۆمییەكان و دواتر نیگەرانی بابەتەكانی تر بن."