دۆناڵد ترەمپ، سەرۆكی ئەمریكا، ئەمڕۆ پێنجشەممە، رایگەیاند، دەیەوێت نرخی نەوت لە جیهاندا دابەزێنێت، هاوكات لەگەڵ لێدوانەكەیدا نرخی نەوت لە بازاڕەكانی جیهان نزمبونەوەی زیاتری بەخۆیەوە بینی.

ئاوێنە: دۆناڵد ترەمپ، سەرۆكی ئەمریكا، ئێوارەی ئەمڕۆ پێنجشەممە، لەمیانی وتەیەكیدا كە لەڕێگەی ڤیدیۆوە لە كۆڕبەندی ئابوریی داڤۆس پێشكەشی كرد، رایگەیاند، داوا لە سعودیە و رێكخراوی ئۆپیك دەكەم نرخی نەوت و تێچوی بەرهەمهێنانی كەم بكەنەوە.

ئەو لێدوانەی ترەمپ راستەوخۆ بوە مایەی زیاتر دابەزینی نرخی نەوت لە بازاڕەكانی جیهانداو لە ئێستادا نرخی یەك بەرمیل نەوتی برێنت بە 78 دۆلار و 35 سەنت مامەڵەی پێوەدەكرێت لەكاتێكدا سەرلەبەیانی ئەمڕۆ بە 78 و 79 سەنت بو.

لەدوای دەستبەكاربونی ترەمپ وەك سەرۆكی ئەمریكا، ماوەی سێ رۆژە نرخی نەوت روی لە دابەزین كردوە ئەوەش بەهۆی هەڕەشەكانی ناوبراو بۆ زیادكردنی پێناسی گومرگی لەسەر كاڵاكانی چەندین وڵاتی هاوبەشی بارزگانیی ئەمریكا، لەنێویشیاندا نەوت.

ترەمپ لە وتەكەیدا بۆ كۆڕبەندی داڤۆس جەختیشی كردەوە كە ئەمریكا گەورەترین یەدەگی نەوت و غازی هەیە بەراورد بە هەر وڵاتێكی دیكە لەسەر گۆی زەوی و وتی، لەمەودوا ئەو یەدەگە "بەكاردەهێنین" و ئەوەش نەك تەنیا دەبێتە مایەی كەمكردنەوەی تێچوی تەواوی كاڵا و خزمەتگوزارییەكان، بەڵكو وا دەكات ئەمریكا ببێتە هێزێكی مەزن لە پیشەسازیدا.

ترەمپ هەروەها وتیشی، سودی بانكی و باج لە ئەمریكا بەتەواوەتی كەم دەكاتەوەو هەڕەشەی سەپاندنی پێناسی گومرگی زیاتری لەسەر ئەو كاڵایانە كرد كە لە دەرەوە هاوردە دەكرێن و وتیشی، پەیامم بۆ خاوەنكارانی جیهان ئەوەیە كە بەرهەمەكانتان لەنێو ئەمریكا دروست بكەن.