لە وەڵامی هەڕەشەكانی دۆناڵد ترەمپ، سەرۆكی ئەمریكا بۆ سەپاندنی سزا بەسەر روسیادا ئەگەر كۆتایی بە شەڕی ئۆكرانیا نەهێنێت، وتەبێژی كۆشكی كرملین دەڵێت، مۆسكۆ ئامادەیە بۆ گفتوگۆ.
ئاوێنە: دمیتری پیسكۆڤ، وتەبێژی كۆشكی كرملین، ئەمڕۆ پێنجشەممە، لە لێدوانێكدا لەبارەی هەڕەشەكانی ترەمپ بۆ سەپاندنی سزا بەسەر روسیادا لە ئەگەری رانەگرتنی شەڕ لە ئۆكرانیا وتی، مۆسكۆ ئامادەیە بۆ گفتوگۆیەكی یەكسان، گفتوگۆیەك كە لەسەر بنەمای رێزگرتنی دولایەنە بێت.
وتیشی، ئێمە چاوەڕێی ئەو ئاماژانەین كە هێشتا نەگەیشتون.
دمیتری پیسكۆف وتی، روسیا هیچ شتێكی نوێ لە هەڕەشەكانی دۆناڵد ترەمپ بۆ سەپاندنی سزا بەسەر مۆسكۆدا نابینێت.
وتیشی، ترەمپ حەزی لەو شێوازەی قسەكردنە، لانیكەم لە ماوەی خولی یەكەمی سەرۆكایەتی خۆیدا حەزی لەو شێوازە بو.
دوێنێ چوارشەممە دۆناڵد ترەمپ، سەرۆكی ئەمریكا هەڕەشەی لە پوتین و روسیا كرد كە ئەگەر شەڕی "بێ بەها"ی ئۆكرانیا رانەگرن ئەوا سزای نوێ بەسەر روسیادا دەسەپێنێت.
هەر دوێنێ جێگری باڵیۆزی روسیا لە نەتەوە یەكگرتوەكان لەوباریەوە وتی، بەرلەوەی هەر هەنگاوێك بنێت، سەرۆكایەتی روسیا پێویستی بەوەیە كە بزانێت ترەمپ چی دەوێت لەبارەی ئەگەری رێككەوتن بۆ كۆتاییهێنان بە شەڕ لە ئۆكرانیا.