دۆناڵد ترەمپ، سەرۆكی ئەمریكا رایگەیاند، ئەگەر روسیا كۆتایی بە شەڕ لە ئۆكرانیا نەهێنێت ئەوا سزای نوێی بەسەردا دەسەپێنێت ئەوەش لەڕێگەی زیادكردنی گومرگ لەسەر ئەو كاڵا روسیانەی هەناردەی ئەمریكا دەكرێن.
ئاوێنە: دۆناڵد ترەمپ، سەرۆكی ئەمریكا، ئەمڕۆ چوارشەممە، لە پەیامێكدا لە تۆڕی كۆمەڵایەتی "تروس سۆشیاڵ"، رایگەیاند، ئەگەر بەم زوانە رێككەوتن نەكرێت بۆ راگرتنی شەڕ لە ئۆكرانیا، هیچ بژاردەیەكی دیكەم لەبەردەمدا نییە جگە لە سەپاندنی گومرگ و باج و سزای زیاتر لەسەر هەر شتێك كە روسیا بە ئەمریكای دەفرۆشێت لەگەڵ سەپاندنی سزا بەسەر ئەو وڵاتانەی كە بەشدارن لە شەڕەكە.
ترەمپ ئاماژەی بە ناوی ئەو وڵاتانە نەداوە كە بەشدارن لە شەڕەكەدا.
ترەمپ وتوشیەتی، بەوە خزمەتێكی گەورە پێشكەشی سەرۆك پوتین و روسیا دەكەم كە ئابورییەكەی رو لە شكستە كە ئەم شەڕە بێ بەهایە رابگرن.