وەزیری دەرەوەی ئیدارەی نوێی سوریا لە داڤۆس رایگەیاند، جیاكاریی لەنێوان پێكهاتەكانی وڵاتەكەدا ناكەن و جەختیشی كردەوە كە رێگە بە دابەشبونی سوریا نادەن.
ئاوێنە: ئەسعەد شەیبانی، وەزیری دەرەوەی ئیدارەی نوێی سوریا ئەمڕۆ چوارشەممە، لەمیانی بەشداریكردنی لە گفتوگۆیەكدا لە کۆڕبەندی ئابووریی جیهانیی داڤۆس لە سویسرا جەختی كردەوە "رێگە بە دابەشبونی سوریا نادەین."
وەزیری دەرەوەی سوریا وتیشی، سزاكانی سەر وڵاتەكەی گەورەترین ئاڵەنگارین و لابردنی ئەو سزایانە بنەمان بۆ سەقامگیری سوریا.
وتیشی، پێویستە جیهان سزاكانی رو بكاتە بەشار ئەسەد كە ئێستا لە روسیایە.
جەختیشی كردەوە كە وڵاتەكەی بۆ هەمو پێكهاتەكان دەبێت و بەرەو شەڕی ناوخۆیی یاخود شەڕی پێكهاتەكان هەنگاو نانێن.
وتیشی، دیمەشق گەرەنتی ئەوە دەكات كە ژنان لە سوریا رێزلێگیراو دەبن و رۆڵیشیان لە وڵاتەكەدا دەبێت.
جەختیشی كردەوە كە سوریا كاردەكات بۆ دروستكردنی هاوبەشی لەگەڵ وڵاتانی كەنداو لە كەرتی وزەو كارەباداو وتیشی، سوریا دەیەوێت وڵاتی ئاشتی بێت و هیچ هەڕەشەیەك بۆ سەر وڵاتان دروست ناكات.