ئەمڕۆ چوارشەممە، وەفدی دەم پارتی سەردانی عەبدوڵا ئۆجەلان، رێبەری زیندانیكراوی پەكەكەیان لە ئیمرالی كرد. دیدارەكە چوار سەعاتی خایاندوە.
ئاوێنە: وەفدی دەم پارتی، ئەمڕۆ چوارشەممە، بۆ جاری دوەم سەردانی عەبدوڵا ئۆجەلان، رێبەری زیندانیكردنی پەكەكەیان لە ئیمرالی كرد.
وەفدەكەی دەمپارتی پێكهاتبون لە سیری سورەیا ئۆندەر و پەروین بوڵدان. بەپێی میدیاكانی توركیا، دیدارەكە 4 سەعاتی خایاندوەو كۆتایی هاتوە. وەفدەكەی دەم پارتیش دوای دیدارەكە لە ئیمرالی گەڕاونەتەوە.
دەم پارتی لە راگەیەندراوێكدا وتویەتی، سبەی پێنجشەممە، وەفدەكەی ئیمرالی لەبارەی دیدارەكە، راگەیەندراوێك بڵاودەكاتەوە.
وەفدی دەمپارتی لە 28ـی کانونی یەكەمی 2024، كە پێكهاتبون لە پەروین بوڵدان و سری سورەیا ئۆندەر، سەردانی ئۆجەلانیان كرد لە ئیمرالی، دوای دیدارەکە و لەسەر داوای ئۆجەلان، وەفدەكە لەگەڵ ئەحمەد تورک، هاوسەرۆکی شارەوانی گەورەی مێردین، کە قەیوم لە جێگەی دانراوە، لەگەڵ سەرۆكی پەرلەمانی توركیاو پارتە سیاسییەکان و سیاسەتمەدارە زیندانییەکان كۆبونەوەی جیاجیان ئەنجامدا.
رۆژی 17ی ئەم مانگە وەفدەكەی دەمپارتی لە راگەیەندراوێكدا ئەنجامی كۆبونەوەكانی خستۆتەڕو و جەختی كردەوە كە سەرجەم كۆبونەوەكانیان لەگەڵ سەرۆكی پەرلەمان و لایەنە سیاسییەكان راشكاوانە بون و پڕبون لە هیوای ئەرێنی.
وەفدەكەی دەم پارتی ئاماژەی بەوەشدا "بە هەمو تێڕوانین و هەڵسەنگاندنە ئەرێنییەكانمانەوە، بەم نزیكانە سەردانی ئۆجەلاین دەكەینەوە، ئەوپەڕی هەوڵ دەدەین بۆ گەرەنتیكردنی ئەوەی كە پڕۆسەكە بگاتە ئاشتی و دۆزینەوەی چارەسەر ئەوەش لەڕێگەی میكانیزمی بەهێز و كاریگەرەوە."