پێگەی كۆڵبەر نیوز بڵاویكردەوە، ساڵی رابردو 59 كۆڵبەر لە ناوچە سنورییەكانی رۆژهەڵاتی كوردستان گیانیان لەدەستداوەو لەو ژمارەیەك 44 كۆڵبەریان بە تەقەی راستەوخۆی هێزە چەكدارەكانی ئێران كوژراون.

ئاوێنە: پێگەی كۆڵبەر نیوز، ئەمڕۆ چوارشەممە، لە راپۆرتێكدا ئاماری گیانلەدەستدان و برینداربونی كۆڵبەرانی لە ماوەی ساڵی رابردودا بڵاوكردەوەو رایگەیاند، ژمارەی قوربانیانی كۆڵبەر بەراورد بە ساڵی 2023 زیادی كردوە.

بەگوێرەی ئامارەكە ساڵی رابردو لە ناوچە سنورییەكانی رۆژهەڵاتی كوردستان 59 كۆڵبەر گیانیان لەدەستداوە كە لەو ژمارەیە 44 كۆڵبەریان بەتەقەی راستەوخۆی هێزە چەكدارەكانی ئێران كوژراون و ئەوانی دیكە بەهۆی كەوتنەخوارەوە لە بەرزایەتی، سەرماو بەفر، روداوی هاتوچۆ، وەستانی دڵ لەكاتی كۆڵبەریدا گیانیان لەدەستداوە.

هەر بەپێی راپۆرتەكە لە ساڵی رابردودا 286 كۆڵبەر برینداربون كە 216 كۆڵبەریان بە تەقەی راستەوخۆی هێزە چەكدارەكانی ئێران، برینداربون.

كۆڵبەرنیوز ئاماژەی بەوەداوە كە ژمارەی قوربانیانی كۆڵبەر لەساڵی 2024دا بەراورد بە ساڵی 2023 لەسەدا 15 بەرزبۆتەوە.آ