ئەحمەد شەرع، فەرماندەى پرۆسە سەربازییەکانى سووریا رایگەیاند، وڵاتەکەى بەدەست شەڕەوە ماندوو بووە و نابێتە هەڕەشە بۆ سەر وڵاتانى دراوسێ یاخود وڵاتانى رۆژئاوا.
ئاوێنه: ئەحمەد شەرع، لە دیمانەیەکدا لەگەڵ دەستەى رادیۆى بەریتانى، داواى هەڵگرتنى سزاکانى سەر سووریاى کرد و داواشیکرد دەستەى تەحریرى شام لە لیستى رێکخراوە تیرۆریستییەکان بسڕدرێتەوە، کە لە لیستى تیرۆرى نەتەوەیەکگرتووەکان و ئەمریکا و یەکێتیى ئەوروپا و بەریتانیادایە.
ئەحمەد شەرع، کە پێشتر بە ئەبومحەمەد جۆلانى ناسراو بوو، گوتى "دەستەى تەحریرى شام گرووپێکى تیرۆریستى نییە". ئاماژەى بەوەکرد، ئەوان خەڵکى سڤیل و شوێنە مەدەنییەکان بە ئامانج ناگرن و گرووپەکەى بە قوربانى، تاوانەکانى دەسەڵاتى ئەسەد ناوبرد.
ئەحمەد شەرع، رەتیشیکردووەتەوە سووریا ببێتە کۆپییەکى ئەفغانستان، ئاماژەى بەوەکردووە هەردوو وڵات جیاوازن، دابونەریتى جیاوازیان هەیە و بۆچوونى وایە ئەفغانستان کۆمەڵگەیەکى خێڵەکى هەیە، دەشڵێت سووریا عەقڵیەتێکى جیاوازى هەیە و کە بڕواى بە خوێندنى ژن هەیە.
ئەحمەد شەرع، لە کۆتایى مانگى رابردووەوە سەرۆکایەتیى گرووپە چەکدارەکانى کرد کە لە رۆژى هەشتى کانوونى یەکەم کۆتاییان بە دەسەڵاتى 53 ساڵەى بنەماڵەى ئەسەد هێنا.