وەزیری دەرەوەی ئەمریکا جه‌ختده‌كاته‌وه، "ڕێگەنادەین سوریا ببێتە زەمینەیەکی لەبار بۆ تیرۆر، ده‌شڵێت:"دەبێت هێزە نوێیەکانی سوریا ڕەچاوی پێشبنییەکانی کۆمەڵگەی نێودەوڵەتی بکەن".
ئاوێنە: ئەنتۆنی بلینکن وەزیری دەرەوەی ئەمریکا لەڕاگەیەندراوێکدا ئاماژەی بەوەکرد، "ئەمریکا ڕێگەنادات سوریا ببێتە زەمینەیەکی لەبار بۆ تیرۆر".
وەزیری دەرەوەی ئەمریکا باسی لەوەکرد، "بەخێرایی هەوڵمانداوە کۆدەنگیی لەنێوان وڵاتانی دراوسێی سوریاو کۆمەڵگەی نێودەوڵەتی دروستبکەین سەبارەت بەو ئاراستەیەی جیهان هیواخوازە سوریا هەنگاوی بۆ بنێت".
بلینکن ئاماژەی بەوەشکرد، "ئەگەر هێزە نوێیەکانی سوریا، بەتایبەت دەستەی تەحریری شام، دانپێدانان‌و پشتیوانیی نێودەوڵەتییان بوێت، دەبێت بەباشی ڕەچاوی پێشبنییەکانی کۆمەڵگەی نێودەوڵەتی بکەن".
ئەمە لەکاتێکدایە، چوارشەممەى ڕابردوو ئەحمەد ئەلشەرع (ئەبو محەممەد جۆلانی) فەرماندەی گشتیی ئیدارەی نوێی سوریا، داوای لەکۆمەڵگەی نێودەوڵەتی کرد گەمارۆکانی سەر سوریا هەڵبگرن.
ئەحمەد ئەلشەرع ئاماژەی بەوەشکرد، "پێویستە دەستەی تەحریر شام لەلیستی ڕێکخراوە تیرۆریستییەکان دەربهێنرێت".