ئۆزگور ئۆزال سەرۆکی پارتی گەلی کۆماریی ئۆپۆزسیۆن (جەهەپە)، ڕەخنەی لەسیاسەتی ڕەجەب تەیب ئەردۆغان سەرۆک کۆماری تورکیا بەرامبەر قەیرانی سوریا گرتوەو ڕایگەیاندوە، هەریەک لەئەمریکاو ئیسرائیل براوەی ڕوخانی ئەسەدن‌و تورکیا هیچ دەستکەوتێکی لەو وڵاتە نابێت.
ئاوێنە: ئۆزال لەلێدوانەکانیدا کە بەر لەکۆبونەوەی ئەنجومەنی پارتەکە بۆ تاووتوێکردنی پێشهاتەکانی سوریا داویەتی، جەختی لەوەکردوه‌تەوە، سودمەندی ڕاستەقینەی دۆخی ئێستای سوریا، ئیسرائیل‌و ئەمریکان، نەوەک تورکیا.
ئۆزال ڕونیشیکردوه‌تەوە، پارتەکەیان باوەڕی تەواوی بەوە هەیە کە لەسەردەمی دوای ئەسەددا، دەبێت حکومەتێکی کراوە هەبێت کە گەرەنتی ئەنجامدانی هەڵبژاردنێکی دیموکراسیانە بکات کە هەموو نەتەوە جیاوازەکان لەخۆبگرێت.
هەروەک وتویەتی:"ئێمە ئاواتەخوازی ئەوەبوین لەسەر ئەم بنەمایە پەیوەندیی لەگەڵ ئەسەد دروستبکەین، بەڵام ئەردۆغان سیاسەتێکی بەئامانجی ڕوخاندنی ئەسەد پەیڕەوکرد، ڕێبازێک کە دواتر دەرکەوت تەنها وەهمێکی سیاسییە".
ئۆزال ئاماژەی بەوەشکرد، سەرەڕای بانگەشەکانی ئەردۆغان بەوەی سەرکەوتنی لەسوریا بەدەستهێناوە، بەڵام براوە ڕاستەقینەکان ئیسرائیل‌و ئەمریکان‌و تورکیا هیچ دەستکەوتێکی ئەووتۆی بەدەستنەهێناوە کە شایانی باسکردن بێت.