رۆژنامەی وۆڵ ستریت جۆرناڵ، لەزاری گەورە بەرپرسانی ئەمریکا بڵاویکردووەتەوە، تورکیا و هاوپەیمانەکانی لە گرووپە چەکدارەکان، هێزێکی زۆریان بەدرێژایی سنوورەکان لەگەڵ سووریا، کۆکردووەتەوە.
ئاوێنه: رۆژنامەکە دەڵێت "ئەوە زەنگی مەترسییە بەوەی ئەنقەرە ئامادەکاریی دەکات بۆ کۆنترۆڵکردنی پانتاییەکی فراوان لەناو خاکی سووریا کە ئێستا لەژێر دەستی هەسەدە دان.
رۆژنامە ئەمریکییەکە راشیگەیاندووە، بەرپرسانی کورد لە رۆژئاوای کوردستان داوایان لە ترەمپ، سەرۆکی هەڵبژێردراویی ئەمریکا کردووە، فشار بکاتە سەر ئەنقەرە بۆ رێگریی لە "لەشکرکێشیی" لەو ناوچانە وەکخۆیان وەسفیانکردووە.
بەپرسە ئەمریکییەکان بۆ رۆژنامەکەیان ئاشکراکردووە، ئەو هێزانەی تورکیا لەسەر سنوورەکان کۆیکردووەتەوە، پێکهاتووە لە چەکدارانی گرووپە میلیشیاکان و هێزی کۆماندۆی تورکی، جگە لە جێگیرکردنی ژمارەیەکی زۆر لە تۆپهاوێژ لە نزیک کۆبانێ و بەرپرسە ئەمریکییەکانیش دەڵێن، ئۆپراسیۆنێکی سەربازیی سوپای تورکیا لەسەر سنوورەکان، دەکرێت ئەنجامدانی زۆر نزیک بێت.
لەماوەی رابردوودا لەنێوان گرووپە چەکدارەکانی نزیک لە تورکیا و هەسەدە لەسەر بەنداوی تشرین لەسووریا شەڕ و رووبەڕووبونەوە روویداوە و بۆ ماوەیەکی کاتی ئاگربەست راگەیەندرا، بەڵام ئاگربەستەکە پەیڕەو نەکرا و بەڕێوەبەرایەتیی خۆسەریی داوا دەکات کە بەنداوی تشرین بەچاودێریی نەتەوەیەکگرتووەکان بەڕێوەببرێت، واتە لەژێر دەسەڵاتی هیچکام لە گرووپە چەکدارەکانی تورکیا یاخود هەسەدە بەڕێوەنەبرێت.