فه‌ریق ئیگۆر كیریڵۆڤ فه‌رمانده‌ی هێزی به‌رگریی كیمیایی و بایۆلۆجیی ڕوسیا و یاریده‌ده‌ره‌كه‌ی به ته‌قینه‌وه‌یه‌ك له مۆسكۆ كوژران.
ئاوێنە: چه‌ند خوله‌كێك له‌مه‌وبه‌ر میدیای ڕوسیا هه‌واڵی كوژرانی فه‌ریق ئیگۆر كیریڵۆڤی ڕاگه‌یاند و ده‌ڵێت، به‌یانیی ئه‌مڕۆ سێشه‌ممه 17ـی كانونی یه‌كه‌می 2024 به‌هۆی ته‌قینه‌وه‌یه‌كه‌وه له به‌رده‌م شوێنی نیشته‌جێبوونی له مۆسكۆی پایته‌خت كوژراوه. دواتر لیژنه‌ی لێكۆڵینه‌وه‌كانی ڕوسیا ئاشكرایكرد كه له ته‌قینه‌وه‌كه‌دا یاریده‌ده‌ره‌كه‌ی كیریڵۆڤیش كوژراوه.
له‌باره‌ی ورده‌كاریی ته‌قینه‌وه‌كه و چۆنێتیی ئه‌نجامدانییه‌وه لیژنه‌ی لێكۆڵینه‌وه‌كانی ڕوسیا ئاشكرایكردووه، بۆمبێك له‌سه‌ر ماتۆڕسكیلێكی كاره‌بایی جێگیركراوه كه له ده‌روازه‌ی ئه‌و باڵه‌خانه‌یه‌ی ماڵی فه‌ریق ئیگۆر كیریڵۆڤی تیادایه دانراوه و ده‌ڵێت، "له نێوان 100 بۆ 300 گرام تی ئێن تیی له‌خۆگرتووه".
له كاتی ده‌رچوونی فه‌ریق ئیگۆر كیریڵۆڤ له باڵه‌خانه‌كه كه ده‌كه‌وێته شه‌قامی ڕیازانسكی له خۆرهه‌ڵاتی مۆسكۆ، بۆمبه‌كه ته‌قێندراوه‌ته‌وه و به‌و هۆیه‌وه كیریڵۆڤ و یاریده‌ده‌ره‌كه‌ی گیانیانله‌ده‌ستداوه، لیژنه‌ی لێكۆڵینه‌وه‌كانی ڕوسیا به‌و شێوه‌یه كۆتایی به هه‌واڵی كوژرانی ئه‌و فه‌رمانده سه‌ربازییه‌ی وڵاته‌كه‌ی و یاریده‌ده‌ره‌كه‌ی هێناوه، به‌بێ ئه‌وه‌ی زانیاریی له‌باره‌ی لایه‌نی ئه‌نجامده‌ری ته‌قینه‌وه‌كه‌وه ئاشكرابكات.
كیریڵۆڤ كه له ته‌مه‌نی 54 ساڵییدا كوژرا، له ساڵی 2017ـه‌وه بووه‌ته فه‌رمانده‌ی هێزی به‌رگریی كیمیایی و بایۆلۆجیی ڕوسیا و ناوێكی دیاری ناو سیستمی به‌رگریی سه‌ربازیی ڕوسیا بوو لای وڵاتانی خۆرئاوا و ئۆكراینا.