هەسەدە رایگەیاند، هەوڵەكانی ئەمریكا بۆ نێوەندگیری لەپێناو راگەیاندنی ئاگربەستی هەمیشەیی لە ناوچەكانی منبج و كۆبانێ، نەگەیشتنە ئەنجام ئەوەش بەهۆی خراپ مامەڵەكردنی لایەنی توركی لەگەڵ ئەو هەوڵانە.
ئاوێنە: ناوەندی راگەیاندنی هێزەكانی سوریای دیموكرات-هەسەدە، ئەمشەو دوشەممە، لە راگەیەندراوێكدا وتی، هەوڵە نێودەنگیرییەكانی ئەمریكا نەگەیشتنە ئەنجام بۆ راگەیاندنی ئاگربەستێكی هەمیشەیی لە ناوچەكانی منبج و كۆبانێ، ئەوەش بەهۆی شێوازی توركیا لە خراپ مامەڵەكردن لەگەڵ هەوڵەكانی نێوەندگیری و خۆدزینەوە لە قبوڵكردنی خاڵە سەرەكییەكان كە خۆیان دەبینییەوە لە گواستنەوەی شەڕڤانانی ئەنجومەنی سەربازی منبج و ئەو هاوڵاتییە مەدەنیانەی شارەكە كە خوازیارن بگوازرێنەوە بۆ ناوچە ئارامەكان لە باكور و رۆژهەڵاتی سوریاو هەروەها پرسی گواستنەوەی روفاتی سلێمان شا بۆ شوێنی پێشوی خۆی.
جەختیشی كردۆتەوە كە وێڕای هاوكاری ئەمریكا بۆ راگرتنی شەڕ، لەگەڵ ئەوەش توركیاو میلیشیاكانی لەماوەی رابردودا بەردەوام بون لەسەر گرژییەكان.