ڕێکخراوی سارا بۆ بەرەنگاربونەوەی توندوتیژی دژی ژنان لە بانگەوازێكی بەپەلەدا داوا لە ئەنجومەنی مافی مرۆڤی نەتەوە یەکگرتوەکان دەكات، دەستێوەردانی خێرا بۆ کۆتاییهێنان بە پێشێلکارییە جددییەکانی دژی ژنان لە باکوری ڕۆژهەڵاتی سوریا، بەتایبەتی لە ناوچەکانی عەفرین، تەل ڕەفعەت، شەهبا (لادێکانی باکوری حەلەب) و منبج، هەروەها پێشێلکاری و ئاوارەبونی زۆرەملێی ژنان ڕابگرن.

ڕێکخراوی سارا، ئەمڕۆ دوشەممە لە بانگەوازێكی بەپەلەدا بۆ سەرۆک و ئەندامانی ئەنجومەنی مافی مرۆڤی نەتەوە یەکگرتوەکان، "داوی دەستێوەردانی بەپەلە دەكات بۆ ڕاگرتنی پێشێلکاری و ئاوارەبونی زۆرەملێی ژنان لە باکوری ڕۆژهەڵاتی سوریا".

ئاماژەی بەوەشكرد، "ئێمە ئەم بانگەوازە بەپەلەیەتان بۆ دەنێرین بۆ دەستێوەردانی خێرا بە مەبەستی کۆتاییهێنان بە پێشێلکارییە جددییەکانی دژی ژنان لە باکوری ڕۆژهەڵاتی سوریا، بەتایبەتی لە ناوچەکانی عەفرین، تەل ڕیفعەت، شەهبا (لادێکانی باکوری حەلەب)، و منبج.

بەگوێریە راگەیەندراوەكە، ڕاپۆرتەکانی ئەو ناوچانە ڕەنگدانەوەی دۆخێکی کارەساتبارن کە داوای هەڵوێستێکی جددی و کاریگەر لە کۆمەڵگەی نێودەوڵەتی دەکات".

بارودۆخی مرۆیی و یاسایی:
1- بەردەوامی ئاوارەبونی زۆرەملێ: ژنان ڕوبەڕوی ئاوارەبونی زۆرەملێی بەرفراوان دەبنەوە. لە ئەنجامی ئۆپەراسیۆنە سەربازییەکان، ناچاربون بە جێهێشتنی ماڵەکانیان و ڕوبەڕوبونەوەی بارودۆخی  سەختی ژیان کە لەگەڵ کەرامەتی مرۆڤدا ناگونجێت.

2- توندوتیژی سیستماتیک: ژنان لەو ناوچانە توشی توندوتیژی جەستەیی و دەرونی دەبنەوە، لەوانەش دەستگیرکردنی ئارەزومەندانە، هەراسانکردن و مامەڵەی خراپ، ئەوەش پێشێلکردنی ئاشکرای یاسا نێودەوڵەتییەکانە کە گەرەنتی پاراستنی هاوڵاتیانی مەدەنی لەکاتی ململانێدا دەکات.

3- بێبەشبون لە خزمەتگوزارییە سەرەتاییەکان: ئافرەتان بەدەست نەبونی چاودێری تەندروستی و خوێندنەوە دەناڵێنن، ئەوەش ئازارەکانیان زیاتر دەکات، بەتایبەتی دایک و ئافرەتانی دوگیان و مەترسی لەسەر سەلامەتی و تەندروستی و ئایندەی منداڵەکانیان دروست دەکات.

4- نەبونی ئاسایش و دادپەروەری: ئاژاوەی ئەمنی و نەبونی دامەزراوەی یاسایی ڕێگری دەکات لە بەدەستهێنانی هیچ پاراستنێک یان بە دەستهێنانی دادپەروەری بەرامبەر هێرشبەرەکانیان.

ڕێکخراوی سارا باسی لەوەشكرد، "ئەو پێشێلکاریانە، پێشێلکارییەکی ئاشکرای یاسای مرۆیی نێودەوڵەتی و بەتایبەتی ڕێککەوتننامەی چوارەمی جنێڤ و بڕیارنامەکانی نەتەوە یەکگرتوەکانە، وەک بڕیارنامەی 1325ی ئەنجومەنی ئاسایش پێکدەهێنن کە جەخت لەسەر پاراستنی ژنان لە ململانێکان و دڵنیابون لە بەشداریکردنیان لە ئاشتیسازیدا دەکات".

داواکارییەکانمان ئاراستەی ئەنجومەنی بەڕێزتان دەکەین:
1-ئەنجامدانی لێکۆڵینەوەیەکی بەپەلە و سەربەخۆی نێودەوڵەتی سەبارەت بەو پێشێلکارییانەی کە بەرامبەر ئافرەتان لەو بوارانەدا ئەنجام دەدرێن، دڵنیابون لەوەی بەرپرسیارانە لێپرسینەوەیان لەگەڵ دەکرێت.

2. دڵنیابون لە پاراستنی هاوڵاتیانی سڤیل بەتایبەتی ژنان، ڕاگرتنی ئاوارەبونی زۆرەملێ، و دەستەبەرکردنی گەڕانەوەی سەلامەت و شکۆمەندانەی ئاوارەکان.

3. پێشکەشکردنی هاوکاری مرۆیی بەپەلە و هەمەلایەنە بۆ ژنانی زیانلێکەوتو، لەوانەش چاودێری تەندروستی و پشتیوانی دەرونی کۆمەڵایەتی.

4- بەرزکردنەوەی بەشداری ژنان لە پرۆسەکانی ئاشتی و بڕیاردان، هاوکات دڵنیابون لە ڕێزگرتن لە مافەکانیان و بەهێزکردنیان لە هەمو بوارەکاندا.

ڕێکخراوی سارا ڕونیكردەوە، "داوا لە ئەنجومەنی مافی مرۆڤ دەکەین بەرپرسیارێتی ئەخلاقی و یاسایی خۆی بەرامبەر بە ژنانی زیانلێکەوتو لەم بوارانەدا بگرێتە ئەستۆ، بێدەنگی کۆمەڵگەی نێودەوڵەتی سەبارەت بەو پێشێلکارییە قورسانە هاندەری بەردەوامبونیان و هەوڵەکانی بنیاتنانی ئاشتی و دادپەروەری تێکدەدات".

دەشڵێت، "هیوادارین ڕێوشوێنی بەپەلە بگرنەبەر و کار بۆ کۆتاییهێنان بە ئازارەکانی ژنان و بەدیهێنانی دادپەروەری خوازراو بکەن".

ڕێکخراوی سارا بۆ بەرەنگاربونەوەی توندوتیژی دژی ژنان، ڕێکخراوێکی مەدەنی ژنانە کە لە 1ی (تەمموز/7)ی 2013 دامەزراوە و کار بۆ بەرەنگاربونەوەی هەمو جۆرەکانی توندوتیژی و هەڵاواردن دژی ژنان دەکات.