بەپێی زانیارییەکانی رۆژنامەی فاینەنشاڵ تایمزی بەریتانی، رژێمی بەشار ئەسەد، سەرۆکی پێشووی سووریا، بڕی 250 ملیۆن دۆلاری بە فڕۆكە لەماوەی ساڵانی 2018 و 2019 رەوانەی رووسیا كردووە.

ئاوێنه‌: رۆژنامەکە ئاماژەی بەوەشکردووە، رژێمی ئەسەد كە بەدەست كەمیی دراوی بیانییەوە ناڵاندوویەتی، "دراوی نەختینەی بە نزیكەی دوو تۆن لە هەردوو جۆری 100 دۆلاری و 500 یۆرۆیی، لە رێی فڕۆكەخانەی فتۆكۆڤۆ لە مۆسكۆی پایتەخت گواستووەتەوە، بۆ دانانی لەو بانكانەی رووسیا كە لەژێر سزادا بوون".

روونیشیكردووەتەوە، لە 13ی ئایاری 2019، فڕۆكەیەك لە مۆسكۆ نیشتووەتەوە و 10 ملیۆن دۆلاری لە جۆری 100 دۆلاری هەڵگرتووە، كە بە ناوی بانكی ناوەندیی سووریاوە رەوانەكراوە.

بەپێی رۆژنامەكە، دواتر لە شوباتی هەمان ساڵدا فڕۆكەیەك بە 20 ملیۆن یۆرۆ لە جۆری 500 یۆرۆیی رەوانەكراوە، كۆی ئەو پارانە كە بەوجۆرە و لەو ماوەیەدا گوازراونەتەوە گەیشتووەتە 250 ملیۆن دۆلار.

ئەمەش لەكاتێكدایە محەمەد بەشیر، سەرۆكی حكومەتی كاتی لەپاش گرتنەدەستی پۆستەكەی رایگەیاند، رژێمی پێشوو هیچ دراوێكی بیانی لە خەزێنەكانی دەوڵەتدا جێنەهێشتووە.

ئەوەی هەتا ئێستا نادیارە، پرسی سامەنەکەی ئەسەد و خێزانەکەیەتی کە بە بەڕوونی نازانرێت، بەهەمان شێوە سەروەت و سامانی ئەو كەسانەی لە سووریا كاربەدەستی باڵا بوون.