ڕەجەب تەیب ئەردۆگان، سەرۆكی توریكا ڕایگەیاند، وڵاتەكەی لەو دۆخە شڵەژاوەی ناوچەکەدا وەک دورگەیەکی ئارام ماوەتەوە و وەک وڵاتێکی خاوەن پێگەیەکی گرنگ دەچێتە پێشەوە، دەشڵێت، "بە پێچەوانەی هاتوهاواری ئۆپۆزسیۆن، ئەمڕۆ دەردەکەوێت کە لە قەیرانی سوریادا چەند گونجاو جوڵاینەوە".

ئاوێنه‌: ڕەجەب تەیب ئەردۆگان، لەمیانەی وتارێكدا لە هەشتەمین کۆنگرەی پارتەکەی کە لە ئه‌رزه‌ڕۆم ڕایگەیاند، "تورکیا لەم دۆخە شڵەژاوەی ناوچەکەدا وەک دورگەیەکی ئارام بەرز دەنرخێدرێت و وەک وڵاتێکی خاوەن پێگەیەکی گرنگ دەچێتە پێشەوە".

ئاماژەی بەوەشكرد، "لەم دۆخە ئاڵۆزەدا بە ڕەچاوکردنی سیاسەتێکی هاوسەنگ، میانەڕەوانە و دادپەروەرانە، قۆناغەکەمان بەڕێوەبرد و هەر واش بەردەوام دەبین".

ڕەجەب تەیب ئەردۆگان باسی لەوەشكرد، "لە شەقامەکانی حەلەب، حومس و شام دوای ساڵانێکی زۆر ڕوخساری شادی لە خەڵکدا دەبیندرێت، دوای 13 ساڵ خوشک و برایانی سوریمان بە هیواوە دەژین".

سەرۆكی تورکیا ڕەخنەی لە سیاسەتەکانی ئۆپۆزسیۆنی وڵاتەکەی گرت و وتی، "ئۆپۆزسیۆن گەیشتوەتە ئاستێک کە دەڵێ ئاکپارتی با بدۆڕێ، ئاکپارتی و هاوپەیمانی جمهور با تێکبچێت، تەنانەت ئەگەر پێویست بێت تورکیاش بڕوخێت".

ئەوەشی خستەڕو، "بە پێچەوانەی هاتوهاواری ئۆپۆزسیۆن، ئەمڕۆ دەردەکەوێت کە لە قەیرانی سوریادا چەند گونجاو جوڵاینەوە".