جەنەڕاڵ حوسێن سەلامی، فەرماندەی سوپای پاسدارانی ئێران ئه‌مڕۆ یەکشەممە ڕایگەیاند، ڕوداوەکانی سوریا "وانەیەکی تاڵن کە دەبێت لێی فێربین"، ده‌شڵێت، "زایۆنیستەکان باجی قورس دەدەن، ئەوان لەو خاکەدا دەنێژرێن، بەڵام ئەمە پێویستی بە ماوەیەکی زۆر، کۆڵنەدانێکی گەورە، هەوڵێکی گەورەیه".
ئاوێنە: جەنەڕاڵ حوسێن سەلامی له لێدوانێكدا ڕایگه‌یاند، "ئەمڕۆ دەبینن ئەو زلهێزە دەرەکیانەی کە ئاگر لە سوریا بەردەدەن، چۆن وەک گورگی برسی کەوتنە سەر ژیانی یەک ئاسک لە بیابانەکاندا، ئەو زایۆنیستیانە ڕویان لە باشور و باکور و ڕۆژهەڵاتی وڵاتەکە کردوە و ئەوەش وانەیەکی تاڵە کە فێری دەبین، بەڵام دەبێت ئەم وانە گەورەیە فێربین بەو وانە گەورانەی کە لە بەرگرییەوە ماونەتەوە".
ئاماژه‌ی به‌وه‌شكرد، "هەموان بینیان تا گەیشتینە ئەوێ خەڵکی سوریا دەژیان، چونکە ئێمە بەدوای کەرامەتی ئەواندا دەگەڕاین، ئێمە نەچوین تا بەشێک لە خاکەکانی سوریا بە خاکەکانی خۆمانەوە بلكێنین، نه‌چوین تا بیكه‌ینه مەیدان بۆ بەرژەوەندییەی خۆمان، ڕۆیشتین بۆ ئەوەی ڕێگە نەدەین کەرامەتی مسوڵمانان لەناوبچێت".
فەرماندەی سوپای پاسدارانی ئێران باسی له‌وه‌شكرد، "زایۆنیستەکان باجی قورس دەدەن، ئەوان لەو خاکەدا دەنێژرێن، بەڵام ئەمە پێویستی بە ماوەیەکی زۆر، کۆڵنەدانێکی گەورە، هەوڵێکی گەورە، ئیرادەیەکی شکۆمەندانە و ئیمانی دەوێت، کە ئەوەش ئەوەیە کە گەنجانی موجاهیدین لە جیهانی ئیسلامیدا پێویستیان پێیه‌تی".
عەلی خامنەیی، ڕێبەری باڵای ئێران لە لێدوانێکدا سەبارەت بە ڕوخانی ڕژێمی ئەسەد، هه‌فته‌ی ڕابردو، ڕایگەیاند، ڕوخانی بەشار ئەسەد "ئێران لاواز ناکات".
خامنەیی وتشی، "بانگەشەی ئەوە دەکرێت کە کاتێک بەرخۆدان لاواز دەبێت، ئێرانی ئیسلامیش لاواز دەبێت، من دوپاتی دەکەمەوە کە ئێران بەهێزە و بەهێزتر و بەهێزتر دەبێت".
خامنەیی، ئیسرائیلی به هۆکاری ڕوخانی ڕژێمی ئەسەد ناوبردو و وتی،، "لە ژورێکی فەرماندەیی ئەمریکی و ئیسرائیلدا پلانی بۆ دانرابو، بەڵگەشمان لەبەردەستە کە هیچ بوارێک بۆ گومان لەم ڕوەوە ناهێڵێتەوە".