حکومەتی کاتیی سوریا داوا لە نەتەوە یەکگرتوەکان دەكات، ئیسرائیل ناچار بکات دەستبەجێ هێرشەکانی بۆ سەر خاکی سوریا رابگرێت و لەو ناوچانەی کە لە سوریا داگیری کردون بکشێتەوە، چونکە ئەوە پێشێلکردنی ڕێککەوتنی ساڵی 1974، دادەنرێت.
ئاوێنە: قوسەی زەحاك، باڵیۆزی سوریا لە نەتەوە یەكگرتوەكان لە دو نامەی هاوشێوەدا بۆ ئەنجومەنی ئاسایشی نێودەوڵەتی و ئەنتۆنیۆ گوتێرێز، سکرتێری گشتیی نەتەوە یەکگرتوەکان، ڕایگەیاندوە، بە ڕێنمایی حکومەتەکەی ئەو داواکاریانە دەخاتەڕو.
زەحاک وتوشیەتی، لە کاتێکدا کە سوریا بە قۆناغێکی نوێ لە مێژوی خۆیدا تێ دەپەڕێت، سوپای ئیسرائیل خاکی وڵاتەكەی لە "جبل الشیخ و پارێزگای قونەیترە" بۆمباران و داگیر دەکات.
ئەوە یەکەم پەیامە لەلایەن حکومەتی کاتیی سوریاوە بە سەرۆکایەتیی محەمەد بەشیر، ئاراستەی نەتەوە یەکگرتوەکان دەکرێت.
ئەو دو نامەیە، لە 9ـی کانونی یەکەمی2024 نێردراون، ئەوەش دوای ڕۆژێک لە ڕوخانی ڕژێمی بەشار ئەسەد، کە زیاتر لە 50 ساڵ حوکمی سوریای کرد.