تۆڕی مافی مرۆڤی کوردستان بڵاوی کردەوە، کۆڵبەرێکی کورد لە دوای سێ ڕۆژ مانەوە لە نەخۆشخانەیەکی کرماشان گیانی لەدەستدا، دەشڵێن: ئەو کۆڵبەرە لە لایەن هێزە چەکدارەکانی ئێرانەوە بە سەختی بریندار کرابوو.
ئاوێنە: تۆڕی مافەکانی مرۆڤی کوردستان سەبارەت بە گیان لەدەستدانی کۆڵبەرێکی کورد بەمجۆرە زانیاریی خستووەتەڕوو، ئەمڕۆ کۆڵبەرێکی کورد بە ناوی مەسعەب سەبزەواری خەڵکی گوندی قشڵاخی لە سنووری ڕوانسەری سەر بە شاری کرماشان لە دوای سێ ڕۆژ مانەوە لە نەخۆشخانەی تاڵقانی کرماشان گیانی لەدەستدا.
ئاماژە بەوەشکراوە، مەسعەب سەبزەواری ڕۆژی چوارشەممەی ڕابردوو لە سنووری نەوسوود بە تەقەی ڕاستەوخۆی هێزە چەکدارەکانی ئێرانەوە سەر و چاوی بە سەختی بریندار کرا و دواتر لە نەخۆشخانە خەوێندرا بە مەبەستی وەرگرتنی چارەسەر.
بە پێی ئامارەکانی کۆڵبەرنیوز، لە شەش مانگی یەکەمی ئەمساڵدا، ١٤٢ کۆڵبەر لە ناوچە سنوورییەکان و ڕێگاکانی نێوان ورمێ و کرماشان بە تەقەی ڕاستەوخۆی هێزە چەکدارەکانی ئێران، ڕنوو و سەرما، کەوتنەسەر مین، کەوتنەخوارەوە لە شاخ و بەرزایی و ڕووداوی دیکە کوژران و بریندار بوون، کە ١٠ کۆڵبەریان خوار تەمەن ١٨ ساڵ بوون.