جەنەڕاڵی سوپای پاسداران و ڕوێژکاری سەربازی ئێران لە سوریا، ڕەحیم نەوعی ئەقدەم، ئەمڕۆ هەینی 13ی کانوونی یەکەمی 2024، ڕایگەیاند، ئەردۆغان پەیامێکی لە بارەی چارەنووسی ئەسەد گەیاندووەتە تاران.
ئاوێنە: ئەو جەنەڕاڵە وتی: لە دەستپێکی شەڕی سوریادا ڕەجەب تەیب ئەردۆغان، سەرۆکی کۆماری تورکیا پەیامێکی گەیاندە تاران، ناوەڕۆکی ئەوە بوو، ئەمەریکا بڕیاری داوە بەشار ئەسەد لە دەسەڵات نەمێنێت.
ئەو جەنەڕاڵە ئێرانییە کەسێکی نزیک و جێی متمانەی قاسم سولەیمانی، فەرماندەی پێشووی فەیلەقی قودسی سوپای پاسداران بووە و لە چاوپێکەوتنێکی تەلەڤزیۆنی وڵاتەکەیدا وتیشی: ئەردۆغان بە ئێرانی ڕاگەیاندووە، ئەمەریکا بڕیاری داوە ئەسەد بڕوات، ئێوەش خۆتان ماڵوێران مەکەن.
ڕوونیکردەوە، عەلی خامەنەیی، ڕێبەری باڵای شۆڕشی ئیسلامی ئێران سوور بوو لەسەر مانەوەی بەشار ئەسەد و ئەو کات قاسم سولەیمانی، فەرماندەی پێشووی فەیلەقی قودسی سوپای پاسدارانی ڕاسپارد، بەرگری لە بەشار بکات و ئەنجامەکەش ئەوە بوو، کە بەشار ڕزگار کرا و لە دەسەڵات مایەوە.
ڕەحیم نەوعی ئەقدەم، وتیشی: کاتێک ئەمەریکا ویستی سەدام بڕوات، کەوت، بۆ قەزافیش هەمان شت ڕاستە، ئێستاش کە ویستوویەتی ئەسەد بکەوێت، دەکەوێت، ئەمە ناوەڕۆکی پەیامەکەی ئەردۆغان بوو بۆ تاران.