ڕۆژنامەی وۆڵ ستریت جۆرناڵ بڵاوی كردەوە، دۆناڵد ترەمپ سەرۆكی هەڵبژێردراوی ئەمریكا بژاردەی هێرشی سەربازی بۆ سەر دامەزراوە ئەتۆمییەكانی ئێران دەخاتە ژێر لێكۆڵینەوە و پێداچوونەوەی جدیتر لەلایەن هەندێك لە ئەندامانی تیمەكەی خۆیەوە.

ئاوێنە: ڕۆژنامەی وۆڵ ستریت جۆرناڵ سەبارەت بە ئەگەری هێرشی ئەمریكا بۆ سەر دامەزراوە ئەتۆمییەكانی ئێران دوای ڕووخانی حكومەتەكەی بەشار ئەسەد، ڕاپۆرتێكی بڵاوكردەوە کە تیایدا هاتووە، لاوازی پێگەی ئێران، دوابەدوای ڕووخانی هاوپەیمانەكەی، كە ڕژێمی ئەسەد بوو لە سووریا و ئاشكرابوونی زیاتركردنی بازرگانی ئەتۆمی تاران، بووەهۆی گفتوگۆی هەستیاری ناوخۆیی، بەڵام هێشتا هەموو وتووێژەكان لەسەر ئەم پرسە لە قۆناغی سەرەتاییدان.

دوو سەرچاوەی ئاگادار لەو دانووستانە ئەتۆمییەكان ڕایانگەیاندووە، ترەمپ لە پەیوەندییەكانی ئەم دواییەدا بە بنیامین ناتانیاهۆ سەرۆك وەزیرانی ئیسرائیلی وتبوو، كە لە ماوەی ئیدارەكەیدا نیگەران بووە لە پێشكەوتنی ئەتۆمیی ئێران، ئەمەش وا پیشان دەدات، ئەمریكا دەیەوێت ڕێگریی لەو كارە ئەتۆمییانە بكات.

دەشڵێن: ترەمپ دەیەوێت پلانێك هەبێت كە بتوانێت سوپای ئەمریكا بۆ ناوچەكە ڕابكێشێت، چونكە لێدان بۆ سەر دامەزراوە ئەتۆمییەكان لە تاران توانای ئەوەی هەیە ئەمریكا و ئێران بخاتە ڕێڕەوی پێكدادانەوە.

بەگوێرەی ڕۆژنامەكە، ئێران بەتەنیا خاوەنی ئەوەندەی یۆرانیۆمی پیتێنراوە، كە بتوانێت چوار بۆمبی ئەتۆمی گەورە درووست بكات.

بەرپرسانی ئەمەریكا پێشتر ڕایانگەیاندبوو، ئێران چەند مانگێكی پێ دەچێت بۆ بەرهەمهێنانی چەكی ئەتۆمی.

ڕۆژنامەكە ئاماژەی بەوەشكردووە، تیمی سەرۆكی هەڵبژێردراوی ئێران خەریكی داڕشتنی ستراتیژییەتی زۆرترین فشارن لە دژی ئێران، كە تیشك دەخاتە سەر سزای توندی ئابووری.

ئەمە لەكاتێكدایە، حكومەتەكەی بەشار ئەسەد كە هاوپەیمانی سەرەكی ئێران بوو ڕووخا، بەهۆیەشەوە ئێران زیانێكی زۆری بەركەوت، كە ناتوانێت چیتر بە ئارەزووی خۆی هاتوچۆی ناوچەكە بكات.