سیناتۆر کریس ڤان هۆڵن، ئەندامی ئەنجومەنی ئەمریكا لە پشكی دیموكراتەكان رایگەیاند، دەبێت پشتیوانی ئەمریكا بۆ هاوپەیمانە كوردەكەنمان لە سوریا بەردەوام بێت و دەشڵێت، نابێت ئەمریكا رێگە بدات میلیشیاكانی سەربە توركیا هێرشبكەنە سەر هێزەكانی سوریای دیموكرات-هەسەدە.
ئاوێنە: ئەو سیناتۆرە لە راگەیەندراوێكدا وتویەتی، لەگەڵ پێشهاتەكانی دۆخی سوریادا، دەبێت پشتیوانی ئەمریكا بۆ هاوپەیمانە كوردەكانمان لە سوریا بەردەوام بێت، لەڕێگەی تەلەفۆنەوە قسەم لەگەڵ مەزڵوم عەبدی، فەرماندەی گشتی هەسەدە كردو جەختم لەسەر بەردەوامی ئەم پشتیوانییە كردەوەو جەختیشم لە گرنگی هاوبەشیمان لەگەڵ هەسەدە كردوە كە ئەو هێزانە وەك سەری رمن لە جەنگی ئێمەدا دژبە داعش.
سیناتۆر کریس ڤان هۆڵن وتوشیەتی، لە بەرژەوەندی ئەمریكادایە كە هاوپەیمانییە بەهێزە بپارێزێت و درێژە بە مانەوەی هێزەكانی ئەمریكا بدات لە باكوری رۆژهەڵاتی سوریا لەپێناو رێگری لە سەرهەڵدانەوەی داعش.
جەختیشی كردۆتەوە كە دەبێت ئەمریكا رێگە نەدات بەو چەكدارانەی كە لەلایەن توركیاوە پشتیوانی دەكرێن، هێرشبكرێتە سەر هێزەكانی سوریای دیموكرات بەبێ سزادانیان و دەشبێت ئەمریكا كاربكات لەپێناو ئاگربەستێكی بەردەوام لەپێناو پشتیوانیكردنی هاوپەیمانەكانمان و ئاسایشی ناوچەكە.