بەپێی ئاژانسی هەواڵی رۆیتەرز، تانكەكانی سوپای ئیسرائیل چوونەتە ناو قوڵایی خاكی سوریا، بەجۆرێك تەنها ٢٥ كلیۆمەتر لە ڕۆژئاوای دیمەشقی پایتەختەوە دوورن.
ئاوێنە: لەلایەکی دیکەشەوە دەستەی پەخشی ئیسرائیلی ئاماژەی بەوە دەکات، ئیسرائیل بە واشنتۆنی راگەیاندووە؛ نیەتی چوونە ناوخاكی سوریای هەیە، لەبەرامبەردا واشنتۆن هیچ رێگرییەكی نیشاننەداوە.
هەر بەگوێرەی وتەی دەستەكە کەلە زاری بەرپرسێك لە ئیدارەی ئەمریكاوە ئاشکرایکردووە، ئیسرائیل بە واشنتۆنی وتووە چوونە ناو خاكی سوریا كاتییە.
ئەوە لە كاتێكدایە، دوێنێ بنیامین ناتانیاهۆ، سەرۆك وەزیرانی ئیسرائیل رایگەیاند، بەرزاییەکانی جۆلانی سوری بۆ هەتاهەتایە دەبێت بە بەشێك لە خاكی وڵاتەکەی.