چەکدارانی ئۆپۆزسیۆن گەیشتنە ناوەندی دیمەشق‌و بەوتەی دوو سەرچاوەی باڵای سوپای سوریا، بەشار ئەسەد دیمەشقی پایتەختی بەجێهێشتوە بۆ شوێنێکی نادیار هەڵاتوە.
ئاوێنە: ئاژانسی ڕۆیتەرز لەزاری دوو ئەفسەری باڵای سوپای سوریاوه بڵاویکردوه‌تەوە، بەرەبەیانی ئەمڕۆ یەکشەممە ئەسەد بەفڕۆکە وڵاتەکەی جێهێشتوە، زانیاریی هەڵاتنی بەشار ئەسەد بەهەمانشێوە لەلایەن ئاژانسی هەواڵی فرانس پرێس بڵاوکراوەتەوە کە ئەسەد بەفڕۆکە هەڵاتوە.
هەروەها ئەو سەرچاوەیە، سەرکردایەتی سوپای سوریاو ئەفسەرەکانی لەڕوخانی ڕژێم ئاگاداردەکاتەوە.
لای خۆیەوە سەرچاوە خۆجێییەکان بەکەناڵی جەزیرەیان ڕاگەیاندوە، منارەی مزگەوتەکانی دیمەشق بەتەکبیرو چەپڵە لێدان دەنگدەدەنەوە، هاوکات ماڵپەڕە سورییەکان ڕایانگەیاندوە، سەرجەم گەشتەکانی فڕۆکەخانەی نێودەوڵەتی دیمەشق ڕاگیراون‌و فڕۆکەخانە چۆڵکراوە.