وه‌زیری ده‌ره‌وه‌ی ئێران په‌یامی سه‌ركردایه‌تی وڵاته‌كه‌ی گه‌یانده سه‌رۆكی سوریا و رایگه‌یاند كه ورده‌كارییه‌كانی ئه‌و پاڵپشتییانه‌یان تاووتوێ كردووه كه پێویسته پێشكه‌شی سوریا بكرێت، ده‌شڵێت: "دۆخه‌كه سه‌خته".
ئاوێنە: عه‌باس عیراقچی، وه‌زیری ده‌ره‌وه‌ی ئێران له دیمه‌شق په‌یامێكی راده‌ستی به‌شار ئه‌سه‌د، سه‌رۆك كۆماری سوریا كرد و جه‌ختی له درێژه‌دان به ئاراسته‌ی "ستراتیژی”ی تاران له "رووبه‌ڕووبوونه‌وه‌ی هێرش و كرده‌وه‌كانی رژێمی زایۆنی و تاقمه تیرۆریستییه‌كان” كرده‌وه.
وه‌زاره‌تی ده‌ره‌وه‌ی ئێران، له به‌یاننامه‌یه‌كدا بڵاوی كرده‌وه كه عیراقچی "سڵاوی عه‌لی خامنه‌یی رێبه‌ری شۆڕشی ئیسلامیی ئێران و مه‌سعود پزیشكیان سه‌رۆك كۆماری گه‌یاندووه‌ته به‌شار ئه‌سه‌د”.
ئاماژه‌ی به‌وه‌شكرد كه وه‌زیره‌كه "هه‌ڵوێستی چه‌سپاوی" تارانی له "پاڵپشتیكردنی حكومه‌ت و گه‌ل و سوپای سوریا له به‌ره‌نگاربوونه‌وه‌ی تیرۆر و پاراستنی ئاسایش و سه‌قامگیری ناوچه‌كه" دووپاتكرده‌وه.
عیراقچی وتی: "جموجوڵه‌كانی ئه‌م دواییه‌ی تاقمه تیرۆریستییه‌كان به‌شێكن له پیلانگێڕییه‌كانی دوژمنانی سه‌قامگیری و ئاسایشی ناوچه‌كه، هه‌روه‌ها ره‌نگدانه‌وه‌ی هه‌ماهه‌نگیكردنی ئامانجه‌كانی تیرۆریستانه له‌گه‌ڵ ئه‌مریكا و قه‌واره‌ی زایۆنیستی بۆ درێژه‌دان به هه‌ڵگیرسانی شه‌ڕ و ناسه‌قامگیری له ناوچه‌كه‌دا، و قه‌ره‌بووكردنه‌وه‌ی شكستی زایۆنیسته‌كانه له‌به‌رده‌م به‌ره‌ی موقاوه‌مه‌دا".
عیراقچی "پشتیوانیی هه‌مه‌لایه‌نه‌ی به‌رده‌وامی كۆماری ئیسلامیی ئێرانی بۆ حكومه‌ت و گه‌لی سوریا و موقاوه‌مه دووپاتكرده‌وه، بۆ رووبه‌ڕووبوونه‌وه‌ی هێرش و كرده‌وه‌كانی رژێمی زایۆنی و تاقمه تیرۆریستییه‌كان” و پێیوایه كه "ئه‌م ئاراسته ستراتیجیه له چوارچێوه‌ی پاراستنی سه‌قامگیری و ئاسایشی هه‌میشه‌یی ناوچه‌كه و پاڵپشتیكردنی ئاسایشی هه‌موو وڵاتانی ناوچه‌كه‌یه."
ئاماژه‌ی به‌وه‌شكرد كه "ئێران متمانه‌ی هه‌یه كه سوریا وه‌ك رابردوو به سه‌ركه‌وتوویی به‌سه‌ر تیرۆر و گروپه تیرۆریستییه‌كاندا زاڵ ده‌بێت."
راگه‌یه‌ندراوه‌كه‌ی وه‌زاره‌تی ده‌ره‌وه‌ی ئێران له زاری به‌شار ئه‌سه‌د سه‌رۆكی سوریاوه، رایگه‌یاندووه كه "سه‌ردانه‌كه‌ی عیراقچی په‌یامێكی به‌هێزی پشتیوانی ئێرانه بۆ وڵاتانی میحوه‌ری موقاوه‌مه دژ به داگیركاری زایۆنیستی".
عیراقچی به ته‌له‌فزیۆنی ده‌وڵه‌تی ئێرانی وتووه كه كۆبوونه‌وه‌كه‌ی له‌گه‌ڵ سه‌رۆكی سوریا "به‌سوود و ڕاشكاوانه و دۆستانه بووه"، ئاماژه‌ی به‌وه‌شكرد، باسیان له بارودۆخی ئێستای ناوچه‌كه و سوریا كردووه، به‌تایبه‌تی "ورده‌كاری ئه‌و پاڵپشتیانه‌ی كه ده‌بێت پێشكه‌ش به سوریا بكرێت".
وه‌زیری ده‌ره‌وه‌ی ئێران راشیگه‌یاند كه "دۆحەكە سه‌خته، به‌ڵام ئازایه‌تی و رۆحی سه‌رۆكی سوریا سه‌رسامكه‌ر بوو... گروپه تیرۆریستییه‌كان پێیان وایه هه‌لێكیان بۆ ره‌خساوه و ده‌توانن بجوڵێن، به‌ڵام رووبه‌ڕوویان ده‌بنه‌وه".