محەمەد شیاع سودانی، سەرۆك وەزیرانی عێراق و مەسعود پزیشكیان، سەرۆک کۆماری ئیسلامی ئێران تاوتوێی پێشهاتەكانی سوریا دەكەن و جەخت لە "گرنگی کارکردن بۆ ڕێگرتن لە خراپتربونی بارودۆخی سوریا" دەكەنەوە.
ئاوێنە: بەپێی راگەیەندراوێكی نوسینگەكەی، ئەمڕۆ یەكشەممە، محەمەد شەیاع سودانی، سەرۆك وەزیرانی عێراق، پەیوەندییەکی تەلەفۆنی لە مەسعود پزیشكیان، سەرۆک کۆماری ئیسلامی ئێرانەوە پێگەیشت.
ئەوەش خراوەتەڕو"لە پەیوەندییە تەلەفۆنییەکەدا تاوتوێی پێشهاتەکانی ناوچەکە کرا بەتایبەتی پێشهاتەکانی سوریا، جگە لەوەی کە لە گۆڕەپانی فەڵەستین ڕودەدات، لە ڕوی بەردەوامی شەڕ و تاوانکارییەکانی هێزی داگیرکەری زایۆنیەوە لە دژی خەڵکی مەدەنی و دامەزراوە گرنگەکان لە کەرتی غەزە."
وەك لە راگەیەندراوەكەدا هاتوە"هەردولا جەختیان کردەوە لەسەر گرنگی بەردەوامبونی هەوڵەکان و هەماهەنگی لە نێوان سەرجەم وڵاتانی ناوچەکە، بۆ ڕاگرتنی شەڕ لە غەززە و کارکردن بۆ ڕێگرتن لە خراپتربونی بارودۆخی سوریا، بەشێوەیەک کە هەڕەشە لە ئاسایش و سەقامگیری ناوچەکە بکات."